“Volkswagen” 2025-ci ilədək elektromobil bazarının lideri olmağı planlaşdırır
Bakı, 16 mart, AZƏRTAC
Almaniyanın “Volkswagen” avtomobil konserni 2025-ci ilədək dünya elektromobil bazarında lider mövqeyi tutmağı planlaşdırır.
AZƏRTAC xəbər verir ki, bu barədə məlumat kompaniyanın saytında yerləşdirilən press-relizdə yer alıb.
Məlumata görə, konsern 2020-ci ildə elektromobil satışını 35 faizə qədər artırıb. Cari ildə bazara elektrik mühərriki ilə işləyən 1 milyon nəqliyyat vasitəsinin çıxarılması gözlənilir. “Volkswagen” yaxın beş ildə elektrik və hibrid mühərrikləri ilə təchiz olunan nəqliyyat vasitələrinin istehsalına 46 milyard avro sərmayə yatırmaq niyyətindədir. Kompaniya 2030-cu ilədək Avropada tam elektriklə işləyən avtomobillərin satış həcmini 60 faizə çatdırmağı düşünür.
Almaniyanın avtomobil konserni, həmçinin Avropada elektrik avtomobilləri üçün akkumulyator istehsal edəcək altı zavoddan ibarət şəbəkə tikməlidir. İlk iki zavod İsveçin Şellefteo və Almaniyanın Zalsqitter şəhərlərində fəaliyyətə başlayacaq.
Bölmənin digər xəbərləri
