Bakı, 28 sentyabr, AZƏRTAC

Əvvəllər mürəkkəb əməliyyatları biz özəl tibb müəssisələrinə göndəriş etməklə icra edirdik, lakin artıq əməkhaqqı sistemində aparılan islahatlar, xarici ölkələrdə təhsil almış və çalışmış həkimlərin tibb müəssisələrimizə cəlb olunması hesabına əlavə və dəyişikliklərdən öncəki 2 min 550 tibbi xidmətin hamısını təqdim edə bilirik.

AZƏRTAC xəbər verir ki, bunu TƏBİB-in icraçı direktoru Vüqar Qurbanov deyib. O qeyd edib ki, xidmətlər zərfinə yeni daxil olan tibbi xidmətləri, çətin əməliyyatları da icra edə bilmək üçün “Yeni klinika”da orqan köçürülməsi, süni mayalanma, mürəkkəb fizioterapiya əməliyyatları, robotik cərrahiyyənin icrasını planlaşdırırıq.

Bütün tibb müəssisələrimizdə laparoskopik əməliyyatları icra edə bilmək üçün avadanlıqlar alınır, avtopark yenilənir, tibbi sərfiyyatın fasiləsiz olması üçün intensiv tədbirlər görülür, xəstəxana idarəetmə sistemini daha mükəmməl etmək üçün çalışırıq. Xidmətlər zərfinə daxil olan tibbi xidmətlərin 2 min 550-dən 3 min 315-ə qədər artırılması xəstəxanalara axını artıracaq. Məsələn, Abşeron Mərkəzi Xəstəxanasına gün ərzində 3 mindən çox xəstə müraciət edir. Tibbi xidmət sayı artıqda bu sayda artım müşahidə olunacaq. Bu səbəbdən tabeli tibb müəssisələrimizdə daha yaxşı və operativ xidmət göstərə bilmək üçün randevu sistemini, növbəli poliklinik sistemini tətbiq etmək zərurəti yaranıb. Həm gündüz, həm axşam saatlarında poliklinika xidmətini tətbiq etmək effektiv olar.

Özəl tibb müəssisələrinə daha çox hansı tibbi xidmətlərlə bağlı göndərişlər etməyimizin statistikasını da aparırıq, laborator xidmətlərin keyfiyyətinin artırılması ilə bağlı da işlər görülür. Vətəndaşlar artıq dövlət xəstəxanaları ilə bağlı məmnuniyyətlərini dilə gətirirlər, şikayətlərin sayında azalma var.