Vüsal Qasımlı: Finteks sektoru bütün iqtisadi sistemin fəaliyyət prinsiplərini dəyişir
Bakı, 24 iyun, AZƏRTAC
Qlobal finteks bazarının həcmi 2030-cu ildə 698,48 milyard dollara çatacaq.
AZƏRTAC xəbər verir ki, bu sözləri İqtisadi İslahatların Təhlili və Kommunikasiya Mərkəzinin icraçı direktoru Vüsal Qasımlı Azərbaycan Banklar Assosiasiyası və Azərbaycan Respublikasının Mərkəzi Bankının təşkilatçılığı ilə keçirilən "Fintex sammit 2025 - Maliyyə Texnologiyalar Sərgisi”ndə çıxışı zamanı deyib.
O bildirib ki, bu, yeni dövrün reallığıdır.
“Süni intellekti fəaliyyətinin mərkəzində tutan fintekslər, yaxın gələcəkdə aydın rəqabət üstünlüyü qazanacaqlar. Bu baxımdan hesab edirəm ki, banklar bu innovasiyaları rəqib deyil, strateji tərəfdaşlıq imkanı kimi qiymətləndirməlidir. Əminliklə söyləmək olar ki, “Bank-Fintex” əməkdaşlığı vasitəsilə həm xərclər azalır, həm də daha çevik və fərdiləşdirilmiş məhsullar təklif olunur. Bankların etimad, kapital və tənzimləyici təcrübə gücü ilə finteks şirkətlərin çeviklik və innovasiya gücü birləşdikdə, ortaya hibrid və daha güclü maliyyə modelləri çıxır. Nəticə etibarilə, bir çox banklar özlərinin finteks qollarını yaradır və ya startaplarla əməkdaşlıq edir. Digər tərəfdən, finteks sektoru yalnız maliyyə texnologiyalarını deyil, bütün iqtisadi sistemin fəaliyyət prinsiplərini dəyişir”, - deyə o nəzərə çatdırıb.
Bölmənin digər xəbərləri
