QAN YADDAŞI
VYANADA XOCALI FACİƏSİNİN İLDÖNÜMÜ QEYD EDİLƏCƏKDİR
Vyana, 24 fevral (AZƏRTAC). Avstriyada fəaliyyət göstərən “Azərbaycan Akademik Birliyi”nin təşkilatçılığı ilə Vyana şəhərinin mərkəzində yerləşən Ştefan meydanında Xocalı soyqırımının 17-ci ildönümü ilə əlaqədar kütləvi aksiya keçirəcəkdir.
Vyana şəhər bələdiyyəsinin və polisin rəsmi icazəsi ilə keçiriləcək aksiyada Azərbaycan torpaqlarının Ermənistan tərəfindən işğalını pisləyən şüarlar, Xocalı soyqırımını əks etdirən fotoplakatlar nümayiş etdiriləcək, faciə barədə film göstəriləcək, soyqırımı ilə bağlı əsas faktlardan ibarət mətn mütəmadi vaxt intervalı ilə alman dilində səsləndiriləcək, informasiya vərəqələri və broşürlər paylanacaqdır.
Elgün Niftəliyev
AZƏRTAC-ın xüsusi müxbiri
Vyana