WUF13-ün Bakıda keçirilməsi ölkəmizin beynəlxalq platformalarda artan rolunun göstəricisidir - ŞƏRH
Bakı, 13 fevral, AZƏRTAC
UN-Habitat tərəfindən təşkil olunan Ümumdünya Şəhərsalma Forumu (World Urban Forum - WUF13) tədbirinin Bakıda keçirilməsi qlobal urban inkişaf gündəliyində mühüm hadisə kimi qiymətləndirilir. Dünyanın müxtəlif ölkələrindən dövlət qurumlarını, beynəlxalq təşkilatları, ekspertləri və vətəndaş cəmiyyəti institutlarını bir araya gətirən forum dayanıqlı şəhərsalma, innovativ urban həllər, sosial inklüzivlik və ekoloji çağırışların müzakirəsi üçün geniş platforma hesab olunur.
Bunu AZƏRTAC-a açıqlamasında Azərbaycan Qadın Sahibkarlığının İnkişafı Assosiasiyasının (AQSİA) İdarə Heyətinin sədri Səkinə Babayeva bildirib.
Onun sözlərinə görə, forumun Azərbaycanda təşkili ölkənin beynəlxalq əməkdaşlıq təşəbbüslərində fəal rolunu nümayiş etdirməklə yanaşı, qeyri-hökumət təşkilatlarının (QHT) qlobal dialoq və tərəfdaşlıq imkanlarını genişləndirir.
“Bu tədbir yerli QHT-lər üçün beynəlxalq təcrübə mübadiləsi aparmaq, yeni layihələrə qoşulmaq və qlobal şəbəkələrlə əlaqələri gücləndirmək baxımından mühüm əhəmiyyət daşıyır. Forumun Bakıda keçirilməsi ölkəmizin beynəlxalq platformalarda artan rolunun göstəricisidir. Bu cür tədbirlər, xüsusilə qadın sahibkarlığı, sosial inklüzivlik və dayanıqlı iqtisadi təşəbbüslər sahəsində fəaliyyət göstərən QHT-lər üçün yeni əməkdaşlıq imkanları yaradır. Beynəlxalq forumlar QHT-lərin qlobal tərəfdaşlarla birbaşa əlaqələr qurmasına, qabaqcıl təcrübələri öyrənməsinə və yerli təşəbbüslərin beynəlxalq səviyyədə tanıdılmasına şərait yaradır. Bu, həm vətəndaş cəmiyyətinin institusional inkişafına, həm də sosial-iqtisadi layihələrin daha səmərəli həyata keçirilməsinə töhfə verir”, - deyə Səkinə Babayeva vurğulayıb.
AQSİA sədri qeyd edib ki, urbanizasiya proseslərinin sürətləndiyi müasir dövrdə QHT-lərin şəhər inkişafı siyasətində iştirakı ictimai maraqların qorunması, sosial həssas qrupların dəstəklənməsi və ekoloji balansın təmin olunması baxımından xüsusi əhəmiyyət kəsb edir: “Ümumilikdə, WUF13-ün Bakıda keçirilməsi Azərbaycanın beynəlxalq urban inkişaf dialoqunda mövqeyini möhkəmləndirməklə yanaşı, QHT-lərin qlobal əməkdaşlıq imkanlarını genişləndirən mühüm platforma kimi dəyərləndirilir. Forum çərçivəsində qurulan yeni əlaqələrin və əməkdaşlıq təşəbbüslərinin gələcəkdə dayanıqlı şəhər inkişafı və vətəndaş cəmiyyətinin güclənməsinə töhfə verəcəyi gözlənilir”.
Bölmənin digər xəbərləri
