Xaçmaz bağlarında nektarinin ondan çox sortu becərilir
Xaçmaz, 25 iyul, Elxan Yusifli, AZƏRTAC
Xaçmazlı təsərrüfatçılar nektarin bağlarından bol məhsul yetişdiriblər.
AZƏRTAC-ın bölgə müxbiri xəbər verir ki, iyul ayının ilk ongünlüyündən başlayaraq bağlardan məhsul toplanılır.
Xaçmaz bağlarından yığılan nektarinin böyük hissəsi qonşu Rusiyanın müxtəlif şəhərlərinə göndərilir. Rusiya bazarlarına aparılan meyvə bir müddət rayon ərazisindəki soyuducu anbarlarda saxlanıldıqdan sonra iritutumlu yük avtomobillərinə yüklənərək qonşu ölkəyə yola salınır.
Hazırda nektarinin bağdan topdansatış qiyməti növündən və keyfiyyətindən asılı olaraq bir kiloqramı 50 qəpikdən 1 manata kimi dəyişən qiymətlərlə satılır.
Son on ildə Xaçmaz rayonunda şaftalı ilə yanaşı, nektarin bağlarının da sahəsi xeyli artıb. Nektarinlər əksər şaftalılardan ölçüsünə görə daha kiçikdir. Bu meyvənin qabığı nazik, hamardır. Nektarin bir qədər aşağı şəkər tərkibinə baxmayaraq, şaftalıdan daha şirindir.
“Nektarinə də şaftalı kimi qulluq olunur. Amma nektarin daha çox diqqət tələb edən meyvədir. Aqrotexniki qulluq, dərmanlama gecikdirilsə meyvələr qurdlu və ləkəli olur. Əvvəllər nektarini şaftalının bir növü kimi bilirdik. İndi Xaçmaz bağlarında nektarinin ondan çox sortu becərilir. Bazarda bu meyvəyə tələbat da çoxdur. Məhsulu yerli bazarda da satırıq. Amma daha çox Rusiyaya göndərilir”,-deyə təsərrüfatçı Bəhruz İsmayılov bildirib.
Nektarin bağlarının hesabatı şaftalı ilə birlikdə aparılır. Hazırda Xaçmaz rayon ərazisində ümumilikdə 2900 hektardan çox şaftalı bağı var. Həmin bağlardan 800 hektara yaxını müasir suvarma sistemi ilə təmin olunan intensiv bağlardır. Hər il bağlardan 7 min tondan çox şaftalı toplanır.
Xaçmazda nektarin və şaftalı bağlarından məhsul yığımı oktyabr ayınadək davam edəcək.
Bölmənin digər xəbərləri
