Xalq-iqtidar birliyi əbədi müstəqilliyin və sürətli inkişafın təminatıdır
Ağcabədi, 16 mart, AZƏRTAC
Yeni Azərbaycan Partiyasının (YAP) VII qurultayı ölkəmizin həyatında yeni siyasi dövrün başlanğıcı kimi tarixə yazıldı. Qurultayda Prezident, partiyanın sədri İlham Əliyevin geniş və məzmunlu çıxışı Azərbaycanın və regionun siyasi mənzərəsini aydın şəkildə əks etdirdi. YAP-ın tarixi zərurətdən yarandığını vurğulayan Prezident həmin dövrdə mövcud çətinliklərə, təzyiqlərə baxmayaraq, ulu öndər Heydər Əliyevin ətrafında birləşən, sağlam ziyalı ordusunun cəsarətinə və əməyinə də yüksək qiymət verdi. Bildirdi ki, ulu öndər Heydər Əliyevin uzaqgörənliyi, zəngin təcrübəsi və siyasi peşəkarlığı sayəsində yaradılan Yeni Azərbaycan Partiyası artıq böyük və effektiv siyasi qüvvəyə çevrilib.
AZƏRTAC-ın bölgə müxbiri xəbər verir ki, bunu Yeni Azərbaycan Partiyası Laçın rayon təşkilatının sədri İlqar İlyasov deyib. Təşkilatın sədri bildirib ki, regionda Azərbaycanın iqtisadi potensialı daim artmaqdadır. İqtisadi müstəqillik siyasi müstəqilliyin möhkəmləndirilməsi baxımından əsas şərtdir. Bu gün istənilən meyar üzrə heç bir dövlətdən asılı deyilik. İqtisadi sahədə qabaqcıl yerlərdəyik - istər xarici borc baxımından, istər iqtisadi artım və adambaşına düşən valyuta ehtiyatları baxımından Azərbaycan öndə gedən ölkələr sırasındadır.
Ölkəmizin davamlı iqtisadi inkişaf üçün Azərbaycanda bütün amillər mövcuddur. Bu gündə ölkəmizə gələn investisiyalar dayanmadan artır ki, bunu da şərtləndirən əsas amillərdən başlıcası daxili sabitlikdir. Odur ki, “Doing Business” layihəsində ölkəmiz öncül yerə layiq görülüb.
Təşkilat sədri bildirib ki, 44 günlük Vətən müharibəsində maddi və mənəvi üstünlüyə malik olan Azərbaycanın qələbə qazanması ölkəmizin tarixində yeni inkişaf mərhələsinin təməlini qoydu. Ötən illərin ən önəmli hadisəsi ərazi bütövlüyümüzün bərpa edilməsi, Vətən müharibəsində parlaq qələbənin qazanılmasıdır. Azərbaycan öz ərazi bütövlüyünü və tarixi ədaləti bərpa etdi, işğalçıları əzəli torpaqlarımızdan qovdu və beləliklə, tarixi ədalət bərpa olundu. Bu gün xalqımızın şanlı qələbəsi hər birimizin qürur mənbəyidir.
44 günlük Vətən müharibəsi göstərdi ki, ölkəmizdə vətənpərvər gənc nəsil yetişib. Vətənə sevgi, düşmənə nifrət hissi ilə yetişən gənc nəsil torpaqlarımızı işğalçılardan azad etdi. Torpaqlarımızın azad edilməsində bütün nəsillərin nümayəndələri uğurlu fəaliyyət göstərdi, ancaq döyüşdə iştirak edənlərin mütləq əksəriyyəti müstəqillik illərində dünyaya gəlmiş və formalaşmış insanlardır. Onlar vətənpərvərlik və fədakarlıq göstərərək canlarından keçdilər, şəhid oldular, qazi oldular, qəhrəman oldular və tarixi ədaləti bərpa etdilər.
Bütün beynəlxalq məsələlərdə dövlətin prioritetləri yalnız milli maraqlarla müəyyən olunur. Bu baxımdan Azərbaycan köklü surətdə bölgədə vəziyyəti dəyişdirə bildi. Prioritetlər arasında qonşu ölkələrlə əməkdaşlıq xüsusi yerə malikdir. Bununla bərabər, biz bütün ölkələrlə münasibətlər qurduq. Azərbaycan Avropa İttifaqı ilə sıx əlaqələr qurub, bu İttifaqa üzv olan 9 ölkə ilə strateji tərəfdaşlıq haqqında müxtəlif sənədlər imzalayıb. Bu gün ölkəmiz Avropa İttifaqı ilə bərabər hüquqlu saziş üzərində işləyir. Beynəlxalq müstəvidə fəal mövqe sərgiləməsi və qlobal təşəbbüslərlə çıxış etməsi Azərbaycana çoxlu sayda tərəfdaş qazandırıb. Vətən müharibəsi dövründə Qoşulmama Hərəkatının üzvləri bütün platformalarda ölkəmizi aktiv şəkildə müdafiə etdilər.
Ölkəmizdə siyasi dialoqun inkişafı dövlət siyasətinin prioritet fəaliyyət istiqamətlərindən biridir. Siyasi partiyaların fəaliyyəti, demokratiyanın inkişafı, iqtisadi azadlıqların bərqərar olması, ölkəmizin güclənməsi dövlətimizin qarşında duran vacib məsələlərdir. Xalqımız tərəfindən ölkədə aparılan siyasi dialoq yüksək qiymətləndirilir. Ölkəmizin gələcək siyasi sistemi və siyasi sisteminin təkmilləşməsi üçün bunun böyük əhəmiyyəti vardır.
Müharibə başa çatsa da, güc faktoru öz aktuallığını qoruyub saxlayır. Əlbəttə ki, Vətən müharibəsi Azərbaycanın şanlı səhifəsi olmaqla, eyni zamanda təcrübədir. Bundan sonra əlbəttə ki, bu təcrübə ölkəmiz üçün əsas olacaq. Azərbaycan daha müasir ordu yaradacaq. 44 günlük müharibədə Azərbaycan XXI əsrin müharibəsini apardı. Elə planlaşdırılmalıdır ki, əlli ildən sonra XXII əsrin müharibəsinə də ordumuz hazır olsun.
Azərbaycan iqtidarı verdiyi vədlərə daim sadiqdir. Ölkəmizdə keçirilən Prezident seçkilərindən sonra dövlət başçısının bəyan etdiyi proqram ardıcıllıqla icra edilir. Prezident seçkilərindən sonra ərazi bütövlüyümüzün bərpası birinci dərəcəli vəzifə kimi müəyyən olunub və bu vəzifə uğurla icra olunub. Qazanılan uğurların bir səbəbi də xalq-iqtidar birliyidir. Bu gün Azərbaycan xalqı müdrik liderinin ətrafında dəmir yumruq kimi birləşib. Bu dəmir yumruq hər zaman düşmənin əzmini qırır, dövlətin qüdrətini, gücünü nümayiş etdirir.
Bölmənin digər xəbərləri
