XARKOVDA AZƏRBAYCANIN MİLLİ QƏHRƏMANININ ADI ƏBƏDİLƏŞDİRİLMİŞDİR
V.Seryogin Tbilisidə cəbhəçi-aviatorlar ailəsində doğulmuşdur. İki yaşında olarkən, 1946-cı ildə Xarkov təyyarə limanında işləməyə təyinat almış valideynləri onu bu şəhərə gətirmişdilər.
Kremençuq aviasiya məktəbini bitirdikdən sonra V.Seryogin doğma Cənubi Qafqaza təyinat almışdır. Burada o, dəfələrlə məsul tapşırıqları yerinə yetirmiş, Xəzər neftçilərini çətin vəziyyətlərdə xilas etmişdir.
1992-ci il yanvarın 28-də V.Seryoginin komandir olduğu vertolyot Şuşa şəhəri üzərində “Stringer” raketi ilə vurulmuşdur. Lakin V.Seryogin alışıb yanan vertolyotu şəhərin dinc əhali yaşayan məhəllələrindən uzaqlaşdırmağa, bununla da yüzlərlə insanın həyatını xilas etməyə müvəffəq olmuşdur. Bu şücaətə görə Viktor Seryogin, Səfa Axundov və Ərəstun Mahmudov ölümündən sonra Azərbaycanın Milli Qəhrəmanı adına layiq görülmüşlər.
Bu günlərdə Azərbaycan-Ukrayna “Dostluq” cəmiyyətinin təşəbbüsü ilə qəhrəman təyyarəçinin Xarkovda 20 ilə yaxın yaşadığı evin divarına onun adını əbədiləşdirən xatirə lövhəsi vurulmuşdur.
