Xarkovun vizit kartına çevrilən heykəllərimiz - REPORTAJ VİDEO
Xarkov, 4 mart, AZƏRTAC
Ukraynanın Xarkov şəhəri həm də heykəlləri ilə tanınır. Rusiyanın Ukraynaya qarşı elan etdiyi müharibədən sonra xarkovlular üçün prioritet məsələlərdən biri də heykəllərini qorumaq idi.
AZƏRTAC-ın Xarkova ezam olunmuş xüsusi müxbirinin verdiyi məlumata görə, bu şəhərdə Azərbaycan mütəfəkkirləri Nizami Gəncəvi və Mirzə Fətəli Axundzadənin də heykəlləri var. Müharibə zamanı onları da qoruyub saxlamaq mümkün olub.
Ukraynanın xalq rəssamları, soydaşlarımız Seyfəddin Qurbanov və Katib Məmmədovun heykəlləri Xarkovun vizit kartına çevrilib. Şəhərin müxtəlif məkanlarında müəllifləri olduğu heykəllər Xarkov sakinləri və qonaqların ziyarətgahına çevrilib.
Xarkov vilayətinin “Fəxri vətəndaşı” Seyfəddin Qurbanov 2021-ci ilin noyabrında koronovirusdan ölməsinə baxmayaraq, bu gün xarkovlular onun əziz xatirəsinin daima yad edirlər. Reportajı hazırlanarkən Seyfəddin Qurbanovun məzarını da yad etdik.
Onun sonuncu işi “Filosoflar abidəsi” kompozisiyası olub. Qazaxıstanın Xarkovdakı fəxri konsulu, azərbaycanlı Emin Nəcəflinin maliyyə dəstəyi ilə gerçəkləşən kompozisiya azərbaycanlı maarifçi və ictimai xadim, dramaturq Mirzə Fətəli Axundzadəyə, qazax filosofu Abay Kunanbayeva və ukraynalı filosof Qriqori Skovoroda həsr olunub.
Xarkov şəhərinin “Fəxri vətəndaşı” soydaşımız Katib Məmmədovun Xarkovda isə ən son işlərindən biri isə dahi mütəfəkkir və şairimiz Nizami Gəncəvinin abidəsidir.
Xarkovda Katib Məmmədovun emalatxanasında görüşüb söhbətləşdik. Müharibənin ilk günlərindən Xarkovu tərk etməyən soydaşımız AZƏRTAC-a müsahibəsində ağrılı-çətin günlərinə baxmayaraq, işlərini davam etdirdiklərini bildirib. “Bu gün də çalışırıq. Müəllifi olduğum əsərləri şükür ki, qoruyub saxlaya bilmişik. Ümid edirik ki, müharibə tezliklə bitər, yeni layihələrlə Xarkov şəhər sakinlərini sevindirərik”, - deyə Katib Məmmədov əlavə edib.
Emil Hüseynli
AZƏRTAC-ın xüsusi müxbiri
Xarkov
Bölmənin digər xəbərləri
