ELM VƏ TƏHSİL
“XƏZƏR İNSAN HÜQUQLARI MƏKTƏBİ” PİLOT TƏHSİL LAYİHƏSİNİN İCRASI BAŞA ÇATMIŞDIR
AZƏRTAC xəbər verir ki, ATƏT-in Bakı ofisinin və Təhsil Nazirliyinin dəstəyi ilə “Xəzər-gələcək naminə tərəfdaşlıq beynəlxalq hərəkatı” İctimai Birliyinin həyata keçirdiyi “Xəzər insan hüquqları məktəbi” layihəsinin icrası başa çatmışdır.
Xəzəryanı rayonların orta məktəblərində insan hüquqlarının tədrisinə yardım etməklə şagirdlərdə insan hüquqları haqqında təsəvvürlərin formalaşdırılması məqsədi daşıyan layihə üç ay müddətində icra olunmuşdur.
Layihə çərçivəsində Lənkəranda və Dəvəçidə müəllimlər üçün “Orta məktəblərdə insan hüquqları kursunun tədrisi” mövzusunda seminarlar keçirilmiş, həmin rayonların yeddi orta məktəbində yuxarı sinif şagirdlərinə insan hüquqları fənni tədris edilmişdir.