“Xəzər TV” “Azerspace-1” peyki vasitəsilə HD formatında yayıma başlayacaq
Bakı, 6 dekabr, AZƏRTAC
Gələn ildən “Xəzər TV” “Azerspace-1” peyki vasitəsilə ən müasir texnologiyaya uyğun HD formatında yayıma başlayacaq. Bununla bağlı “BakuTel-2014” Beynəlxalq telekommunikasiya və informasiya texnologiyaları sərgisi çərçivəsində “Azərkosmos” ASC və “Xəzər” TV arasında anlaşma memorandumu imzalanıb.
“Azərkosmos”-dan AZƏRTAC-a bildirilib ki, HD formatı görüntünün daha dolğun və yüksək keyfiyyətlə ötürülməsinə imkanı verir.
Qafqazda yeganə peyk operatoru olan “Azərkosmos” ASC rəqəmli yayım, VSAT şəbəkələri və digər telekommunikasiya xidmətlərinin göstərilməsi üçün peyk tutumları təqdim edir. Gələcəkdə ikinci telekommunikasiya peykinin orbitə çıxarılması və Yer səthinin məsafədən müşahidəsinə dair kommersiya xidmətlərinin göstərilməsi planlaşdırılır.
Bölmənin digər xəbərləri
