Xəzər Universitetində qloballaşmanın problemləri və riskləri mövzusunda seminar keçirilib
AZƏRTAC xəbər verir ki, tədbir universitetin siyasi elm və beynəlxalq münasibətlər departamentinin təşkilatçılığı ilə reallaşıb.
Seminarda Böyük Britaniyanın keçmiş müdafiə naziri, parlamentin üzvü Liam Foks məruzə ilə çıxış edib. O bildirib ki, Azərbaycan dünya üçün vacib ölkələrdən biridir. Azərbaycan enerji təhlükəsizliyinin təminində mühüm rol oynayır. NATO Əfqanıstanda həyata keçirilən sülhyaratma əməliyyatlarında bu ölkə ilə tərəfdaşlıq edir. Bir sözlə, Azərbaycan vacib tərəfdaşdır.
Ermənistan-Azərbaycan, Dağlıq Qarabağ münaqişəsinə toxunun britaniyalı qonaq qeyd edib ki, bu problem beynəlxalq hüququn norma və prinsipləri çərçivəsində həll olunmalıdır.
Sabiq müdafiə naziri dünyada təhlükəsizliyin qorunması istiqamətində səylərin gücləndirilməsinin vacib olduğunu bildirib. O deyib ki, dünya dövlətləri arasında güclü qarşılıqlı asılılıq mövcuddur. Bunun isə həm müsbət, həm də mənfi tərəfləri var. Qarşılıqlı asılılıq ticarət əlaqələri və inkişaf üçün geniş imkanlar, eyni zamanda, qaçılmaz risklər yaradır. L.Foks terrorizm, insan alveri kimi mənfi hallara qarşı mübarizədə dünya ölkələrinin daha sıx əməkdaşlıq etməsinin vacibliyini vurğulayıb.
Sonda sabiq nazir seminar iştirakçılarının dünyada baş verən hadisələrlə bağlı suallarını cavablandırıb.
Bölmənin digər xəbərləri
