“Xocalı – qan yaddaşımız!” mövzusunda “dəyirmi masa” keçirilmişdir
Ağsu, 23 fevral (AZƏRTAC). Ağsu rayon Mərkəzi Kitabxanasında ötən əsrin ən dəhşətli hadisələrindən olan Xocalı soyqırımının 21-ci ildönümünə həsr edilmiş “Xocalı-qan yaddaşımız!” mövzusunda “dəyirmi masa” keçirilmişdir.
AZƏRTAC xəbər verir ki, rayon ziyalılarının, gənclərin, qanlı hadisələrin şahidi olmuş Xocalı qaçqınlarının iştirak etdiyi tədbirdə unudulması heç vaxt mümkün olmayacaq, azərbaycanlılara qarşı erməni soyqırımının ən dəhşətli nümunəsi sayılan bu faciənin, bu hadisələr içində erməni faşizminin əsl xislətinin mahiyyəti bir daha bütün çılpaqlığı ilə açılıb göstərilmişdir. Rayon ziyalılarından Yaşar Qarayev, Sənan Nemətov, Salatın Səmədova, Xocalı sakini Əmrah Məmmədov və başqaları Xocalıda azərbaycanlıların kütləvi surətdə qətlə yetirilməsini, bu soyqırımının, məqsədli şəkildə törədilməsini, beynəlxalq hüquqa zidd, insanlığa yaraşmayan ağlasığmaz bir qətliam olduğunu vurğulamışlar.
Qeyd olunmuşdur ki, Xocalı soyqırımı zamanı cəmi bir neçə saat ərzində 613 nəfər dinc azərbaycanlı, o cümlədən 63 uşaq, 106 qadın, 70 qoca öldürülmüş, 487 nəfər yaralanmış, 1275 nəfər girov götürülmüşdür ki, onlar da dözülməz işgəncələrə məruz qalmışlar.
“Dəyirmi masa”da çıxış edənlər, Prezident İlham Əliyevin rəhbərliyi ilə ölkəmizin getdikcə qüdrətlənməsindən qürur duyduqlarını, Xocalı soyqırımını törədənlərin gec-tez öz layiqli cəzalarını alacaqlarına əmin olduqlarını söyləmişlər.
Axırda Xocalı soyqırımına həsr olunmuş film nümayiş etdirilmiş, iştirakçılar faciənin ildönümü ilə əlaqədar hazırlanmış kitab sərgisinə baxmışlar.
Bölmənin digər xəbərləri
