“Xocalı faciəsi - əsrimizin soyqırımı” mövzusunda tədbir keçirilmişdir
Bakı, 22 fevral (AZƏRTAC). Fevralın 22-də Yasamal Rayon Heydər Əliyev Mərkəzində soyqırımının 21-ci ildönümünə həsr olunmuş “Xocalı faciəsi - əsrimizin soyqırımı” mövzusunda tədbir keçirilmişdir.
AZƏRTAC xəbər verir ki, tədbirdə Xocalı faciəsi qurbanlarının xatirəsi bir dəqiqəlik sükutla yad edilmişdir.
Tədbirdə çıxış edənlər 21 il əvvəl Azərbaycan xalqına qarşı törədilmiş dəhşətli soyqırımı həqiqətlərindən, bu qanlı cinayətə məhz ümummilli lider Heydər Əliyevin verdiyi hüquqi-siyasi qiymətdən, Heydər Əliyev Fondunun vitse-prezidenti Leyla xanım Əliyevanın təşəbbüsü ilə irəli sürülmüş “Xocalıya ədalət” kampaniyasının Xocalı həqiqətlərini dünya ictimaiyyətinə çatdırmaq istiqamətində həyata keçirdiyi müxtəlif tədbirlərdən söz açmışlar.
A.M.Şərifzadə adına mədəniyyət mərkəzinin üzvlərinin və Yasamal rayonundakı 167 nömrəli orta məktəbin şagirdlərinin ifasında Xocalı soyqırımına həsr olunmuş bayatılar səsləndirilmişdir.
Həmçinin mərkəzin foyesində 24 nömrəli uşaq və gənclərin yaradıcılıq mərkəzinin dərnək üzvlərinin Xocalı faciəsinə həsr olunmuş əl işləri nümayiş olunmuşdur.
Bölmənin digər xəbərləri
