Xocalı faciəsinin 19-cu ildönümü ilə bağlı Strasburqda etiraz mitinqi keçiriləcəkdir
Bakı, 19 fevral (AZƏRTAC). Azərbaycanlıların və digər Türkdilli Xalqların Əməkdaşlıq Mərkəzi (ATXƏM) Strasburq “Azərbaycan Evi” ilə birgə fevralın 24-dən 27-dək Xocalı faciəsinin 19-ci ildönümü ilə bağlı Strasburqda silsilə tədbirlər keçirəcəkdir.
AZƏRTAC xəbər verir ki, “Xocalıya ədalət” kampaniyası çərçivəsində fevralın 26-da Strasburqun Kleber meydanında etiraz mitinqin keçirilməsi də nəzərdə tutulmuşdur.
Fransada fəaliyyət göstərən türk diaspor təşkilatlarının da dəstəyi ilə reallaşacaq tədbirlərdə ATXƏM-in sədri İlham İsmayılov, Azərbaycan Prezidenti Administrasiyasının ictimai-siyasi məsələlər şöbəsinin diasporla iş sektorunun müdiri Qafar Əliyev, Milli Məclisin deputatı Fuad Muradov və Xocalı faciəsinin şahidi, “Azərbaycan Respublikası Dağlıq Qarabağ Bölgəsinin Azərbaycanlı İcması” İctimai Birliyi idarə heyətinin üzvü Cavid Əliyev iştirak edəcəklər.
Qeyd edək ki, ATXƏM və Strasburq “Azərbaycan Evi”nin keçən il Xocalı faciəsinin 18-ci ildönümü ilə bağlı Strasburqda təşkil etdiyi mitinqə ermənilər müdaxilə edərək, onun keçirilməsinə mane olmağa çalışmışlar. Lakin Strasburqun hüquq mühafizə orqanları yarana biləcək insidentin qarşısını alaraq, erməniləri Kleber meydanından uzaqlaşdırmışdılar.
Bu il Strasburqda təşkil ediləcək mitinqin daha möhtəşəm keçəcəyini və ermənilərin yenidən insident yaratmaq cəhdləri nəzərə alınaraq təşkilatçılar tərəfindən Strasburqun hüquq mühafizə orqanlarına rəsmi müraciət olunmuşdur.
Bölmənin digər xəbərləri
