Xocalı faciəsinin 21-ci ildönümü ilə bağlı Nizami rayonunda tədbir keçirilmişdir
Bakı, 23 fevral (AZƏRTAC). Bakının Nizami rayonundakı Ərəstun Mahmudov adına 220 nömrəli məktəb-liseydə Xocalı faciəsi qurbanlarının xatirəsi ehtiramla yad edilmişdir.
AZƏRTAC xəbər verir ki, tədbir iştirakçıları əvvəlcə rayon məktəbləri arasında Xocalıya həsr olunmuş müsabiqə qaliblərinin rəsm sərgisinə baxmışlar.
Xocalı soyqırımı qurbanlarının əziz xatirəsi bir dəqiqəlik sükutla yad edilmişdir.
Məktəbin direktoru, Əməkdar Müəllim Almaz Əsgərova vurğulamışdır ki, Xocalı soyqırımı təkcə azərbaycanlılara deyil, bütün bəşəriyyətə, insanlığa qarşı törədilmiş ən böyük faciələrdəndir. Faciənin qurbanı olanlar yalnız etnik mənsubiyyətlərinə - azərbaycanlı olduqlarına görə amansızcasına öldürülmüş, işgəncələrə məruz qalmış və şikəst edilmişlər.
Daha sonra çıxış edən Nizami Rayon İcra Hakimiyyətinin başçısı Tahir Budaqov demişdir ki, Xocalı faciəsi Dağlıq Qarabağ münaqişəsi zamanı baş vermiş ən dəhşətli hadisələrdəndir. Bu gün Xocalı haqqında həqiqətin dünyada bilinməsi, bu faciənin xalqımıza qarşı soyqırımı aktı kimi tanınması üçün Azərbaycan dövləti bütün zəruri addımları atır. “Xocalıya ədalət” beynəlxalq kampaniyası bu istiqamətdə təbliğat işini daha da fəallaşdırmışdır.
Bildirilmişdir ki, Azərbaycan xalqı və dövləti Xocalı faciəsini heç vaxt unutmur və unutmayacaqdır.
Tədbirdə Nizami rayon Uşaq-Gənclər Yaradıcılıq Mərkəzinin Xocalı faciəsinə həsr edilmiş tamaşası nümayiş olunmuşdur.
Tədbirdə Milli Məclisinin deputatı Flora Qasımova, Yeni Azərbaycan Partiyası Nizami rayon təşkilatının sədri, parlamentin deputatı Sədaqət Vəliyeva da çıxış edərək faciə ilə bağlı fikirlərini bölüşmüşlər.
Bölmənin digər xəbərləri
