Xocalı faciəsinin 30-cu ildönümü ilə əlaqədar Macarıstanda onlayn konfrans təşkil olunub
Budapeşt, 26 fevral, AZƏRTAC
Xocalı faciəsinin 30-cu ildönümü ilə əlaqədar fevralın 25-də Azərbaycan Respublikasının Macarıstandakı səfirliyi və Kütləvi zorakılığın qarşısının alınması üzrə Budapeşt Mərkəzi tərəfindən onlayn konfrans təşkil edilib.
AZƏRTAC xəbər verir ki, konfrans Azərbaycan Respublikasının Dövlət Himninin səsləndirilməsi ilə başlayıb. Daha sonra, Xocalı qətliamının qurbanları bir dəqiqəlik sükutla yad edilib.
Tədbirdə çıxış edən ölkəmizin Macarıstandakı səfiri Tahir Tağızadə Qarabağ münaqişəsinin ən qanlı səhifələrindən olan Xocalı soyqırımı barədə iştirakçılara məlumat verib. Səfir 44 günlük Vətən müharibəsi nəticəsində torpaqlarımızın Ermənistan işğalından azad edildiyini və münaqişəyə son qoyulduğunu qeyd edib. O, silahlı münaqişələrin hələ də dinc əhalinin həyatına son qoyduğu dünyamızda kütləvi zorakılığın qarşısının alınması, regionumuzda sülhün və əmin-amanlığın daimi olması, xalqlarımız arasında barışıq prosesinin başlaması üçün Ermənistan hökuməti və xalqı tərəfindən Xocalı faciəsinə görə məsuliyyətin qəbul edilməsinin vacibliyini vurğulayıb.
Səfirin çıxışından sonra iştirakçılara Vaqif Mustafayevin Xocalı soyqırımına həsr olunmuş “Dərdimi çəkirəm” adlı qısa filmi nümayiş etdirilib. Filmdə faciənin qurbanlarını lentə almış Seyidağa Mövsümov öz xatirələrini izləyicilərlə bölüşüb.
Tədbir Kütləvi zorakılığın qarşısının alınması üzrə Budapeşt Mərkəzinin sədri Georgi Tatarın çıxışı ilə davam edib. G.Tatar soyqırımı, müharibə cinayətləri və insanlıq əleyhinə cinayətlərlə əlaqədar beynəlxalq səviyyədə görülən tədbirlər və mövcud beynəlxalq təcrübə barədə məlumat verib. Eyni zamanda, G.Tatar rəhbərlik etdiyi Mərkəzin Azərbaycan və Ermənistanın vətəndaş cəmiyyəti institutlarının iştirakı ilə vebinarlar təşkil etməklə münaqişə sonrası barışıq prosesinə töhfə verməyə çalışdığını bildirib.
Azərbaycan Respublikasının Milli Məclisinin deputatı, Azərbaycan - Macarıstan parlamentlərarası dostluq qrupunun üzvü Şahin Seyidzadə öz növbəsində tədbir iştirakçılarını Xocalı faciəsinin tarixi və hüquqi aspektləri barədə məlumatlandırıb. Ş.Seyidzadə, həmçinin ölkəmizin 44 günlük Vətən müharibəsindəki tarixi Qələbəsini, beynəlxalq aləmdə tanınan sərhədlərimizin və ərazi bütövlüyümüzün bərpa olunmasını diqqətə çatdırıb.
Daha sonra, Xocalı faciəsinin şahidlərindən Həsən Ələkbərov onlayn konfransa qoşularaq yaşadıqları barədə xatirələrini iştirakçılarla bölüşüb. Faciədə yaxın ailə üzvlərinin əksəriyyətini itirən H.Ələkbərov Ali Baş Komandanın dəmir iradəsi və igid ordumuz sayəsində torpaqlarımızın işğaldan azad olunduğunu fəxrlə qeyd edib.
Tədbirdə, həmçinin litvalı hərbi jurnalist, Xocalı faciəsinin dünya ictimaiyyətinin diqqətinə çatdırılmasına mühüm töhfə vermiş Riçardas Lapaitis şahidi olduğu dəhşətli hadisələr barədə təəssüratlarını dilə gətirib. O, ölkəsinə qayıtdıqdan sonra erməni diasporası tərəfindən üzləşdiyi təhdidlər və yalanlar barədə danışıb. Bir çox jurnalistlərin hələ də qorxduqlarına görə həqiqətləri söyləməyə cəsarət etmədiklərini vurğulayıb.
Pərvanə Qarayeva
AZƏRTAC-ın xüsusi müxbiri
Budapeşt
Bölmənin digər xəbərləri
