Xocalı faciəsinin otuzuncu ildönümünə həsr olunmuş silsilə tədbirlər təşkil edilib
Bakı, 24 fevral, AZƏRTAC
Qaradağ Rayon İcra hakimiyyətinin inzibati binasında rayon rəhbərliyinin Qaradağ rayonunda məskunlaşmış Xocalıdan olan şəhid ailələri ilə görüşü olub.
Rayon icra hakimiyyətindən AZƏRTAC-a bildirilib ki, görüşdə 1988-ci ildən başlamış Qarabağ münaqişəsi tarixində ən dəhşətli və qəddar faciələrdən birinin Xocalıda baş vermiş soyqırımı olduğu diqqətə çatdırılıb. Qeyd edilib ki, Xocalı faciəsi iki yüz ilə yaxın bir müddətdə erməni millətçiləri tərəfindən azərbaycanlılara qarşı həyata keçirilən etnik təmizləmə və soyqırımı siyasətinin davamı və ən qanlı səhifəsidir. Onların məqsədi Qarabağı və digər Azərbaycan torpaqlarını ələ keçirmək, xalqımızın müstəqillik və ərazi bütövlüyü uğrunda mübarizə əzmini qırmaq idi. Lakin xocalılar qəhrəmanlıq göstərib, erməni-sovet hərbi birləşmələrinə qarşı igidliklə vuruşub, xalqımızın qəhrəmanlıq tarixinə şərəfli səhifələr yazıblar.
Yalnız ümummilli lider Heydər Əliyevin sayəsində Xocalı faciəsi əsl siyasi-hüquqi qiymətini alıb. Soyqırımı haqqında həqiqətlərin dünya dövlətlərinə və beynəlxalq ictimaiyyətə çatdırılması üçün təsirli tədbirlər görülüb.
Prezident İlham Əliyev bu faciənin dünya ictimaiyyətinə çatdırılmasında müstəsna işlər görüb. “Xocalıya ədalət!” şüarı ilə haqq səsimizi dünyaya çatdırmaq istiqamətində xüsusi tapşırıqlar icra edilib.
Vətən müharibəsində qazanılan Qələbə və Böyük Zəfər onu deməyə əsas verir ki, xocalıların və bütün şəhidlərin qanı yerdə qalmadı, onların qisası alındı və demək olar ki, artıq Qarabağa dönüş başlanılıb.
Tədbirdə bir neçə şəhid ailəsi çıxış edərək onlara göstərilən diqqətə, qayğıya və yaradılan şəraitə görə ölkə Prezidenti, Müzəffər Ali Baş Komandan İlham Əliyevə minnətdarlıqlarını bildiriblər.
Daha sonra tədbir Lökbatan qəsəbəsindəki Ə.Əmirov adına Mədəniyyət Evində davam etdirilib. Əvvəl Qaradağ rayon 5 nömrəli uşaq incəsənət məktəbinin təqdimatında Xocalı soyqırımına dair rəsm əsərlərinin sərgisinə baxış keçirilib, sonra Xocalı qurbanlarının əziz xatirəsi bir dəqiqəlik sükutla yad edilib, faciəyə həsr olunmuş film nümayiş olunub.
Tədbirdə Qaradağ Rayon İcra Hakimiyyəti başçısının birinci müavini Emil Abbasov, Milli Məclisin deputatı Aydın Hüseynov, Xocalıdan şəhid ailəsi Elməddin Həsənov çıxış edərək faciə barədə fikirlərini səsləndiriblər.
Yekunda Qaradağ rayon Cabbar Qaryağdıoğlu adına 9 nömrəli musiqi məktəbinin hazırladığı ədəbi-bədii kompozisiya göstərilib.
Bölmənin digər xəbərləri
