“Xocalı fəryadı” mövzusunda tədbir keçirilmişdir
Bakı, 22 fevral (AZƏRTAC). Fevralın 22-də Trend mətbuat mərkəzində Xocalı faciəsinin 21-ci ildönümü ilə bağlı “Xocalı fəryadı” mövzusunda tədbir keçirilmişdir.
AZƏRTAC xəbər verir ki, tələbələrin iştirak etdiyi tədbirdə Xocalı faciəsi qurbanlarının əziz xatirəsi bir dəqiqəlik sükutla yad edilmişdir.
“Türkiyə universitetləri məzunları” İctimai Birliyinin gənclər mərkəzinin sədri Aida İmamova bildirmişdir ki, 1992-ci il fevralın 25-dən 26-na keçən gecə erməni silahlı birləşmələri Xocalıda insanlığa sığmayan vəhşiliklər törətmişlər. Bədnam qonşularımızın amansızlığını tamamilə ifşa edən soyqırımı aktı yalnız soydaşlarımıza qarşı deyil, bütövlükdə insanlığa qarşı törədilmiş cinayətdir. Xocalı həqiqətlərinin dünyaya çatdırılması istiqamətində mühüm addımlar atılır. Sevindirici haldır ki, Xocalı qətliamının dünyada tanınması məqsədi ilə Ağ evin rəsmi veb səhifəsində səsvermə üçün tələb olunan 100 min səs artıq toplanmışdır.
Digər çıxış edənlər də gəncləri tariximizin qanlı səhifəsi olan Xocalı faciəsini unutmamağa, soyqırımı faktının dünya ictimaiyyətinə çatdırılmasında fəal olmağa çağırmışlar.
Tədbirdə, həmçinin mövzu ilə bağlı videoçarx nümayiş etdirilmişdir.
Bölmənin digər xəbərləri
