REGİONLAR
Xocalı qətliamı ermənilərin azərbaycanlılara qarşı həyata keçirdiyi etnik təmizləmə və soyqırımı siyasətinin davamıdır
Masallı, 20 fevral, Bağır Əliyev, AZƏRTAC
“Masallı gənclər evi” sosial xidmət müəssisəsində rayon Gənclər və İdman İdarəsinin, Dini Qurumlarla İş üzrə Dövlət Komitəsinin Masallı bölgəsi üzrə şöbəsinin və Masallı Dövlət Regional Kollecinin birgə təşkilatçılığı ilə “Xocalı - bəşəriyyətə qarşı tarixi cinayət” mövzusunda konfrans keçirilib.
AZƏRTAC-ın bölgə müxbiri xəbər verir ki, tədbir iştirakçıları Azərbaycanın suverenliyi və ərazi bütövlüyü uğrunda şəhid olanların, Xocalı soyqırımı qurbanlarının xatirəsini bir dəqiqəlik sükutla yad ediblər.
Konfransda çıxış edən Masallı Rayon Gənclər və İdman İdarəsinin rəisi Sabiq Cahangirov bəşər tarixinin ən dəhşətli faciələrindən biri olan Xocalı soyqırımı haqqında danışaraq bildirib ki, bu qanlı aksiya özünün amansızlığına və qəddarlığına görə faşistlərin törətdikləri cinayətləri belə geridə buraxıb. Yaşlıların, uşaqların, qadınların kütləvi surətdə qətlə yetirilməsi Xocalıda soyqırımı aktı törədildiyini əyani surətdə sübut edir.
Tədbirdə Dini Qurumlarla İş üzrə Dövlət Komitəsinin Masallı bölgəsi üzrə şöbəsinin müdiri Elvin Hüseynli Azərbaycan tarixinin acı səhifələrindən biri olan Xocalı soyqırımının dəhşətləri barədə danışaraq qeyd edib ki, törədilən qətliam misli görünməmiş qəddarlıq və tarixdən silinməz bir soyqırımıdır.
“Masallı gənclər evi” sosial xidmət müəssisəsinin metodisti Tural Sadıqov çıxışında bildirib ki, Xocalı faciəsi iki yüz ilə yaxın bir müddətdə erməni millətçiləri tərəfindən azərbaycanlılara qarşı müntəzəm olaraq həyata keçirilən etnik təmizləmə və soyqırımı siyasətinin davamı və ən qanlı səhifəsidir.
Sonda tədbir iştirakçılarına Masallı Rayon Gənclər və İdman İdarəsi tərəfindən Xocalı soyqırımının 30-cu ildönümü ilə əlaqədar hazırlanmış bukletlər paylanılıb.