Xocalı soyqırımı qurbanlarının xatirəsi Nyu-Yorkda da anılacaqdır
Bakı, 17 fevral (AZƏRTAC). Fevralın 25-də Xocalı soyqırımı qurbanlarının xatirəsi Nyu-Yorkda da anılacaqdır. Hər il olduğu kimi, bu il də Ermənistanın BMT-dəki daimi nümayəndəliyinin binası qarşısında etiraz aksiyası keçiriləcəkdir.
AZƏRTAC xəbər verir ki, Xocalı soyqırımının 19-cu ildönümü ilə bağlı etiraz aksiyası Gənc Türklər Dərnəyi və Nyu-York Azərbaycan Assosiasiyası tərəfindən təşkil ediləcəkdir. ABŞ-da fəaliyyət göstərən digər dərnəklər də aksiyaya dəstək verəcəyini bəyan etmişlər.
Aksiyada erməni əsgərlərinin 1992-ci ildə fevralın 25-dən 26-na keçən gecə Xocalıda 83-ü uşaq, 106-sı qadın olmaqla 613 günahsız insanı amansızcasına qətlə yetirməsi faktı əsas olaraq göstəriləcəkdir. Əsrin ən böyük insanlıq cinayətlərindən biri olduğu faciənin bütün dünya tərəfindən tanınması, qəbul edilməsi tələb olunacaqdır.
Bundan əlavə, fevralın 25-də BMT-nin qarşısındakı Dag Hammarskjold parkında da etiraz aksiyası keçiriləcəkdir. Burada da Xocalı faciəsinin qurbanlarının xatirəsi anılacaq, cinayəti törədənlərin cəzalandırılması tələb ediləcəkdir.
Bölmənin digər xəbərləri
