Xocalı soyqırımı qurbanlarının xatirəsi Qubadakı kütləvi məzarlıqda anılmışdır
Quba, 23 fevral (AZƏRTAC). Xocalı soyqırımı qurbanlarının xatirəsi Qubadakı kütləvi məzarlıqda anılmışdır.
AZƏRTAC xəbər verir ki, tədbirdə rayon gənclər və idman idarəsinin, “Yurd” Gənclərin İntellektual İnkişafına Dəstək və “Xocalı Soyqırımını Tanıtma” İctimai birliklərinin, eləcə də “İrfan” ictimai fikir jurnalının üzvləri iştirak etmişlər.
Tədbir iştirakçılarına kütləvi məzarlıq barədə ətraflı məlumat verilmişdir. Bildirilmişdir ki, 2007-ci ilin aprelində aşkarlanmış Quba kütləvi məzarlığından əksəriyyəti uşaq, qadın və qocalara məxsus olan 400-dən çox insanın sümükləri tapılmışdır. Azərbaycan Milli Elmlər Akademiyasının Arxeologiya və Etnoqrafiya İnstitutu tərəfindən aparılan tədqiqatlar nəticəsində məlum olmuşdur ki, məzarlıqda kütləvi şəkildə basdırılanlar ötən əsrin əvvəllərində erməni silahlıları tərəfindən vəhşicəsinə öldürülən yerli sakinlərdir.
Daha sonra anma mərasimi Quba bələdiyyəsinin akt zalında şagirdlərin, tələbələrin və fəal gənclərin iştirakı ilə davam etdirilmişdir.
Mərasimdə Xocalı soyqırımı qurbanlarının xatirəsi bir dəqiqəlik sükutla yad edilmişdir.
Çıxış edənlər xalqımızın başına gətirilmiş müsibətlərin səbəbkarlarının törətdikləri cinayət əməllərinə görə layiqli cəzalarını alacaqlarına əminlik ifadə etmişlər. O müdhiş gecə barədə ətraflı danışan natiqlər bildirmişlər ki, son illərdə ölkə rəhbərliyi tərəfindən Xocalı soyqırımının dünya ictimaiyyətinə çatdırılması istiqamətində böyük işlər görülmüşdür.
Tədbirin sonunda Xocalı faciəsini əks etdirən film göstərilmişdir.
Bölmənin digər xəbərləri
