XOCALI SOYQIRIMININ 14-CÜ İLDÖNÜMÜ XARİCİ ÖLKƏLƏRDƏ DƏ QEYD OLUNACAQDIR
X X X
Fevralın 25-də isə Polşadakı Azərbaycan səfirliyində Azərbaycan-Polşa Mədəniyyət Assosiasiyasının, Azərbaycan-Polşa Mədəniyyət Cəmiyyətinin, Demokratik Azərbaycan Təşkilatının və Azərbaycan Mədəniyyət və İnformasiya Mərkəzinin iştirakı ilə “Xocalı soyqırımı” ilə əlaqədar anma mərasimi keçiriləcəkdir.
X X X
Elə həmin gün “Azərbaycan Türk Kültür Mərkəzi”nin təşəbbüsü ilə Haaqada yerləşən Beynəlxalq İnsan Haqları Məhkəməsinin qarşısında mitinq keçiriləcək. Hollandiyada fəaliyyət göstərən bütün Azərbaycan və türk diaspor təşkilatlarının aksiyada iştirak edəcəyi gözlənilir.
X X X
Fevralın 25-də Özbəkistanın paytaxtı Daşkənddə Azərbaycanın bu ölkədəki səfirliyi ilə birlikdə Heydər Əliyev adına “Azərbaycan Evi”, Azərbaycanlıların Milli-Mədəni Mərkəzlərinin Assosiasiyası və Azərbaycan Gənclər təşkilatı Xocalı soyqırımına həsr olunmuş konfrans keçirəcəklər.
X X X
Fevralın 26-da Azərbaycanın Macarıstandakı səfirliyinin və Macarıstan-Azərbaycan Dostluq Cəmiyyətinin birgə təşəbbüsü ilə Macarıstanda təhsil alan azərbaycanlı tələbələr tərəfindən “Xocalı soyqırımı” ilə əlaqədar anım mərasimi təşkil olunacaqdır. Elə həmin gün “Azəri-Çex” Cəmiyyəti tərəfindən “Xocalı soyqırımı” ilə əlaqədar keçiriləcək anma mərasimində “Xocalı soyqırımı”na aid sənədli film nümayiş etdiriləcəkdir.
Ümumrusiya Azərbaycan Konqresi Azərbaycan Respublikasının Rusiyadakı səfirliyi ilə birlikdə Xocalı soyqırımına həsr olunmuş anma mərasimi keçirəcəkdir. Faciənin ildönümü ilə bağlı Rusiyanın bir sıra regionlarında anma mərasimlərinin, konfransların keçirilməsi planlaşdırılır.
X X X
Xocalı faciəsinin 14-cü ildönümü ilə bağlı Türkiyədəki Azərbaycan icmaları tərəfindən də müxtəlif tədbirlər keçiriləcəkdir. Fevralın 26-da İstanbul Azərbaycan Kültür və Dayanışma Dərnəyinin Xocalı faciəsinin 14-cü ildönümü ilə əlaqədar İstanbulda keçirəcəyi anma mərasimində burada yaşayan soydaşlarımız və təhsil alan azərbaycanlı tələbələr, ictimaiyyət nümayəndələri iştirak edəcəklər.
Elə həmin gün İzmir Azərbaycan Kültür Evi və Dayanışma Dərnəyinin təşəbbüsü ilə İzmir şəhərində Xocalı faciəsinin ildönümü ilə əlaqədar tədbir keçirəcəkdir. Tədbirdə İzmir Azərbaycan Evi və Dayanışma Dərnəyinin sədri Turqut Arat, dərnəyin üzvləri, İzmir Ege universitetinin müəllim heyəti və bu şəhərdə təhsil alan tələbələrimiz iştirak edəcəklər.
X X X
Xocalı soyqırımı qurbanlarının xatirəsi Misirdə də anılacaqdır. Fevralın 26-da Misir Ərəb Respublikasında təhsil alan tələbələrimizin yaratdıqları “Vətən“ təşkilatı Qahirə şəhərindəki EL-Şəms universitetində Xocalı faciəsinin 14–cü ildönümü ilə əlaqədar tədbir keçirəcəkdir. Tədbirdə Qahirədə təhsil alan azərbaycanlı tələbələrin və digər millətlərin nümayəndələrinin iştirakı gözlənilir.
X X X
Fevralın 28-də isə “Avstriya Azərbaycan Akademik Birliyi” Avstriya Xarici Məsələlər üzrə Akademik Forumu (Vyana) ilə birgə Vyana Diplomatik Akademiyasında Xocalı faciəsinin on dördüncü ildönümünə həsr olunmuş elmi-praktik konfrans keçirəcəkdir. Konfransda 200-ə yaxın gənc diplomat, Avstriya KİV-nin nümayəndələri, bir çox tədqiqatçı-alimlər iştirak edəcəklər.
Bölmənin digər xəbərləri
