Xocalıda törədilən erməni vəhşilikləri unudulmayacaq
Bakı, 25 fevral, AZƏRTAC
Fevralın 25-də Səfərbərlik və Hərbi Xidmətə Çağırış üzrə Dövlət Xidməti Azərbaycan Respublikası Gənclər Fondu ilə birgə Goranboy rayonunun Aşağı Ağcakənd qəsəbəsindəki Xocalı rayon Mədəniyyət Evində bu şəhərin müdafiəsi zamanı şücaət göstərmiş veteranlarla gənclərin görüşünü təşkil edib.
Xidmətdən AZƏRTAC-a bildiriblər ki, “Xocalıya ədalət!” beynəlxalq kampaniyası çərçivəsində təşkil olunan tədbirin iştirakçıları əvvəlcə faciə qurbanlarının xatirəsini ehtiramla anıblar.
Tədbirdə Xocalı Rayon İcra Hakimiyyəti başçısının müavini Vahid Əliyev çıxış edərək 27 il əvvəl baş vermiş faciənin ermənilər tərəfindən xalqımıza qarşı aparılan düşmənçilik siyasətinin tərkib hissəsi olduğunu, Xocalı soyqırımının planlı şəkildə hazırlanıb həyata keçirildiyini bildirib. Qeyd edib ki, yüzlərlə Xocalı sakininin xüsusi amansızlıqla qətlə yetirilməsi insanların yaddaşına qanla yazılıb. Bütün dünyanın gözü önündə törədilmiş bu soyqırımı insanlığa qarşı qanlı cinayətdir. Təkcə bir gecədə 613 nəfər öldürülüb. Onların 63-ü uşaq, 106-sı qadın, 70-i qoca idi.
Səfərbərlik və Hərbi Xidmətə Çağırış üzrə Dövlət Xidməti aparatının şöbə rəisi, mayor Füzuli İsmayılov o məşum gecədə aralarında körpə, yaşlı və qadınların da olduğu mülki şəxslərin dəhşətli işgəncələrlə qətlə yetirilməsinin erməni vəhşiliyinin ifadəsi olduğunu vurğulayıb. Qeyd edib ki, Azərbaycan dövləti tərəfindən bu faciəyə hüquqi qiymət verilib. Bu gün Xocalı soyqırımının beynəlxalq aləmdə tanıdılması bir tərəfdən günahsız qurbanların ruhu qarşısında ədalətin bərpasına xidmət edir, digər tərəfdən isə dünyada belə dəhşətlərin bir daha baş verməməsi üçün çağırış rolunu oynayır.
Gənclər Fondunun nümayəndəsi Ramil Məmmədov Ermənistanın işğalçı ölkə olmasının və etnik düşmənçilik zəminində azərbaycanlılara qarşı soyqırımı həyata keçirməsinin beynəlxalq təşkilatlar, eləcə də xarici dövlətlər tərəfindən tanınması məqsədilə görülmüş işlərdən söhbət açıb.
“Xocalıya ədalət!” beynəlxalq kampaniyasının mütəxəssisi Cəbrayıl Fərzəliyev bildirib ki, bu soyqırımının beynəlxalq müstəvidə tanıdılması, ona ədalətli qiymətin verilməsi istiqamətində mütəmadi iş aparılır. Bu kontekstdə Heydər Əliyev Fondunun vitse-prezidenti Leyla Əliyevanın təşəbbüsü ilə həyata keçirilən “Xocalıya ədalət!” beynəlxalq kampaniyası çərçivəsində görülən işlər diqqətə çatdırılıb.
Xocalının müdafiəsində iştirak etmiş veteranlar azsaylı döyüşçülərin mərkəzdən kömək gəlməməsinə, qüvvələrin, silah-sursat və hərbi texnikanın sayının qeyri-bərabər olmasına baxmayaraq, erməni quldur dəstələrinə və 366-cı alaya qarşı qəhrəmanlıqla döyüşdüklərindən danışıblar. Çıxışlarda müasir gəncliyə vətənpərvərlik örnəyi olan Xocalı döyüşçülərinin xatirəsinin hər zaman xatırlanacağı bildirilib. Veteranlar bu gün də döyüşə getməyə, Azərbaycan Prezidenti İlham Əliyevin rəhbərliyi ilə qüdrətli Silahlı Qüvvələrimizin tərkibində torpaqlarımızı işğaldan azad etməyə hazır olduqlarını vurğulayıblar.
Sonra məktəblilər Vətənə həsr olunmuş şeirlər söyləyiblər.
Bölmənin digər xəbərləri
