XOCALILILAR RESPUBLİKA PREZİDENTİNİN DAXİLİ VƏ XARİCİ SİYASƏTİNİ DƏSTƏKLƏYİRLƏR
AZƏRTAC-ın müxbiri xəbər verir ki, Goranboy rayonunun Aşağı və Yuxarı Ağcakənd qəsəbələrində məskunlaşmış, 16 illik köçkünlük müddətində dövlətin daim diqqət və qayğısını hiss edən xocalılılar gələcəyə nikbin baxırlar. Onlar inanırlar ki, ölkə başçısının apardığı uğurlu daxili və xarici siyasət nəticəsində gec-tez çəkdikləri əziyyətə son qoyulacaq və öz dədə-baba yurdlarına qayıdacaqlar.
Bu fikirlər Xocalı Rayon İcra Hakimiyyətində 2007-ci ilin yekunları və 2008-ci ildə qarşıda duran vəzifələrə həsr olunmuş hesabat yığıncağında səslənmişdir. İstər rayon icra hakimiyyətinin başçısı Şahmar Usubovun məruzəsində, istərsə də rayon sakinlərinin çıxışlarında respublikamızın sürətli inkişafının bu arzunun reallaşmasına imkan yaradacağına əminlik ifadə olunmuşdur.
Yığıncaqda qeyd edilmişdir ki, respublikamızın hər yerində olduğu kimi, Xocalı rayonundan olan məcburi köçkünlərin məskunlaşdıqları ərazilərdə də bir sıra tikinti və abadlıq işləri görülmüşdür. Aşağı Ağcakənd qəsəbəsində respublika Daxili İşlər Nazirliyinin və Dövlət Sığorta Kommersiya Şirkətinin maliyyə dəstəyi ilə ümummilli liderimiz Heydər Əliyevin adını daşıyan istirahət parkı salınmış, körpü tikilmiş, rayon prokurorluğu və yol-tikinti idarəsi üçün inzibati binalar inşa edilərək istifadəyə verilmişdir. Bundan başqa, asfalt zavodu tikilmiş, məcburi köçkünlərin məskunlaşdıqları 2 bina təmir olunmuş, ümumi məbləği 803,3 min manat olan yol-təmir işləri görülmüşdür.
Məlumat verilmişdir ki, aqrar bölmənin inkişafı istiqamətində də uğurlu nəticələrə nail olunmuşdur. Hesabat dövründə hüquqi və fiziki şəxslər tərəfindən 12170 sentner taxıl, 22460 sentner kartof, 4170 sentner tərəvəz, 1430 ton isə tərəvəz məhsulları istehsal edilmişdir. Əvvəlki ilə nisbətən mal-qaranın baş sayı artırılaraq 25617 başa çatdırılmışdır. Nəticədə 2007-ci ildə 3220 sentner ət, 28780 sentner süd, 180 sentner yun istehsal olunmuşdur.
Məruzəçi və çıxış edənlər bildirmişlər ki, hər il olduğu kimi, 2007-ci ildə də Heydər Əliyev Fondu rayon təhsil sistemində aparılan islahatlara öz köməyini əsirgəməmişdir. Məktəblərə 27 ədəd kompyuter hədiyyə edilmiş, bir neçə məktəbdə təmir işləri aparılmışdır. Həyata keçirilən tədbirlər nəticəsində tədrisin keyfiyyəti xeyli yüksəlmişdir. Ali məktəblərə sənəd vermiş 61 məzundan 21 nəfəri tələbə adını qazanmışdır. Meşəli kənd orta məktəbinin şagirdi Orxan Şükürov 680 bal toplayaraq Prezident təqaüdünə layiq görülmüşdür. Üç abituriyent isə 500-dən artıq bal toplamışdır.
Qeyd edilmişdir ki, keçən il əhalinin sosial müdafiəsi mərkəzi tərəfindən 13 nəfərə sosial müavinət, 1 ailəyə isə ünvanlı sosial yardım verilmişdir.
Yığıncaqda 2008-ci ildə həlli vacib məsələlərdən də danışılmışdır. Bildirilmişdir ki, Aşağı Ağcakənd qəsəbəsinə qaz xəttinin çəkilməsinə və bankomatların quraşdırılmasına, rayon mərkəzi xəstəxanasında bəzi ixtisaslar üzrə həkimlərə, mədəniyyət obyektlərinin avadanlıqla təchizatına ehtiyac vardır.
Daxili işlər nazirinin müavini Vilayət Eyvazov çıxış edərək respublikamızda qazanılan uğurlardan danışmış və ölkə başçısı İlham Əliyevin apardığı məqsədyönlü siyasət nəticəsində qaçqınların və məcburi köçkünlərin gec-tez öz doğma yurdlarına qayıdacaqlarına əminliyini bildirmişdir.
Tədbir iştirakçıları adından Azərbaycan Prezidenti İlham Əliyevə müraciət qəbul olunmuşdur.
Yığıncaqda Prezidentin İcra Aparatının məsul əməkdaşı Rövşən Ağayev iştirak etmişdir.
Bölmənin digər xəbərləri
