XX əsrin ən böyük faciəsi “Xocalı uşaqları – Qan içində qar çiçəyi” povestində
Bakı, 18 fevral (AZƏRTAC). Çağdaş Azərbaycan ədəbiyyatının tanınmış simalarından olan Səriyyə Müslümqızının “Yazıçı” nəşriyyatında çapdan çıxmış povesti “Xocalı uşaqları - Qan içində qar çiçəyi” adlanır.
AZƏRTAC xəbər verir ki, Azərbaycan, rus və ingilis dillərində işıq üzü görmüş yeni əsər geniş oxucu kütləsi üçün nəzərdə tutulmuşdur.
S.Müslümqızı bu əsəri XX əsrdə azərbaycanlılara və eləcə də bütün bəşəriyyətə qarşı törədilmiş ən ağır cinayətlər sırasında dayanan, özünün də şahidi olduğu Xocalı faciəsi fonunda qələmə almışdır.
Erməni və keçmiş sovet hərbçilərinin 1992-ci ilin fevralın 25-dən 26-na keçən gecə Xocalıda dinc sakinlərə qarşı həyata keçirdikləri soyqırımı aktının dəhşətləri kitabda bədii dillə, obrazlı şəkildə öz əksini tapmışdır.
Vətənpərvər yazıçının ürəyinin qanı ilə yoğurulmuş bu əsərini oxuyan hər kəs kitabda yer almış tarixi fotoşəkillərə baxdıqca o dəhşətli günləri yenidən xatırlayacaq və xalqımızın, o cümlədən onun körpə fidanlarının başına gətirilmiş müsibətlərin miqyasını bir daha dərk edəcəkdir.
Bölmənin digər xəbərləri
