RƏSMİ XRONİKA
YAP-IN İCRAÇI KATİBİ, MİLLİ MƏCLİSİN DEPUTATI ƏLİ ƏHMƏDOVUN ÇIXIŞI
Hörmətli mərasim iştirakçıları!
Xanımlar və cənablar!
Azərbaycanın qanunverici orqanı olan Milli Məclisin binasında xalqımızın dahi oğlu, ən böyük azərbaycanlı, müasir Azərbaycanın və müstəqil dövlətimizin qurucusu Heydər Əliyevin abidəsinin açılması əlamətdar və dərin məna kəsb edən hadisədir.
Heydər Əliyev bütün həyatı boyu Azərbaycan xalqını ən yüksək səviyyədə layiqincə və ləyaqətlə təmsil etmişdir. Ona görə də ali təmsilçilik orqanında ümummilli liderimizin abidəsinin qoyulması təkcə xalq təmsilçilərinin Heydər Əliyevə olan hörmət və ehtiramının, məhəbbətinin deyil, daha çox onlara səs verən milyonlarla azərbaycanlının dahi rəhbərimizə sönməz məhəbbətinin ifadəsidir.
Bu əlamətdar hadisənin daha bir əhəmiyyəti də ondan ibarətdir ki, Azərbaycanın taleyüklü günlərində, təlatümlü dövrlərdə Heydər Əliyevin əfsanəvi qayıdışı və xilaskarlıq missiyasının yolu da Milli Məclisin binasından keçmişdir. Məhz bu binadan başlayaraq, o, ölkəmizi 1990-cı illərin əvvəllərində düçar olduğu ağır vəziyyətdən xilas etmişdir. Təbiidir ki, bu binanın özü də Heydər Əliyev tərəfindən, onun rəhbərliyi altında inşa olunmuşdur. Bu da bugünkü açılış mərasimini məntiqli, mənalı edir. Heydər Əliyev bütün həyatını Azərbaycan xalqına xidmətə həsr etmişdir. O, müasir, müstəqil Azərbaycan dövlətini qurub və gələcək nəsillərə bəxş etmişdir. Hər bir Azərbaycan vətəndaşının isə borcudur ki, Heydər Əliyevin bizlərə qoyub getdiyi, əmanət etdiyi nə varsa, hamısını qorusun, inkişaf etdirsin, zənginləşdirsin, onu daha da yüksəklərə qaldırsın.
Heydər Əliyevin fiziki yoxluğu hər bir azərbaycanlının qəlbində təbii bir nisgil yaradır. Lakin Heydər Əliyevin ideyalarının, siyasətinin yaşaması bizim qəlbimizi ovundurur. Bizi bu gün Heydər Əliyev siyasətini layiqincə və ardıcıl surətdə həyata keçirən Azərbaycan Prezidenti İlham Əliyevin ətrafında sıx birləşməyə səsləyir.
Əziz mərasim iştirakçıları!
Mən belə düşünürəm ki, hər bir dahi insana, kamil, qüdrətli şəxsiyyətə həqiqi və tam qiymət vermək haqqı iki subyektə - xalqa və tarixə məxsusdur. Azərbaycan xalqı özünün dahi oğlu Heydər Əliyevə həmişə yüksək qiymət vermişdir və bu qiymət birmənalıdır. 34 il ərzində Azərbaycana Heydər Əliyevin xidmət etməsi xalqın bu şəxsiyyətə, dahi insana verdiyi qiymətin bariz ifadəsidir. Xalqın Heydər Əliyevə verdiyi qiymətin digər bir bariz ifadəsi də, burada deyildiyi kimi, 2003-cü ilin oktyabr ayının 15-də keçirilən prezident seçkilərində Heydər Əliyev siyasətini birmənalı şəkildə dəstəkləməsi və bu siyasətin layiqli davamçısı İlham Əliyevə səs verməsidir.
Tarix də Heydər Əliyevin layiq olduğu qiyməti vermişdir. Bu gün Heydər Əliyev çağdaş tariximizin və çağdaş dünyamızın ən möhtəşəm, ən dahi insanları sırasındadır. Bu gün Heydər Əliyev çağdaş tariximizin bir hissəsi olmaqla yanaşı, Azərbaycanımızın müstəqillik, dövlətçilik, tərəqqi və inkişaf tarixidir. Hər bir azərbaycanlı başa düşür ki, müasir Azərbaycanı Heydər Əliyevsiz təsəvvür etmək mümkün deyildir. Heydər Əliyev özü də bunu duyurdu və ona görə də deyirdi ki, nə qədər Azərbaycan var, mən də varam. Nə qədər Azərbaycan varsa, hər bir vətəndaşımızın qəlbində Heydər Əliyev sevgisi, məhəbbəti əbədi yaşayacaqdır. Müdriklər deyir ki, qəhrəmanlar əbədiyaşardır. Ən böyük qəhrəmanlıq dahilikdir. Elə ona görə də, dahilərə əbədiyaşarlıq haqqı daha çox xasdır. Zaman keçəcək, illər ötəcək, yeni-yeni nəsillər gələcəkdir. Lakin Heydər Əliyevin xatirəsi bütün gələcək nəsillərin qəlbində həmişə yaşayacaqdır. Heydər Əliyevin ideyaları gələcək nəsillərin şüuruna hakim kəsiləcəkdir. Zamanın uca zirvəsindən onun Azərbaycan siması, Vətən sevgisi, şəxsiyyət qüdrəti daha aydın və əzəmətli görünəcəkdir.