Yaponiya hökuməti paytaxt Tokioda və üç prefekturada fövqəladə vəziyyət rejimini aradan qaldıracaq
Tokio, 18 mart, AZƏRTAC
Yaponiya hökuməti martın 21-də paytaxt Tokioda və qonşuluqda yerləşən üç prefekturada koronavirus pandemiyasına görə tətbiq edilən fövqəladə vəziyyət rejimini aradan qaldıracaq.
AZƏRTAC xəbər verir ki, bununla da Yaponiyanın bütün ərazisində yanvardan tətbiq edilən fövqəladə vəziyyət rejimi ləğv olunacaq.
Qeyd edək ki, hazırda fövqəladə vəziyyət rejimi Tokioda və paytaxtın yaxınlığında yerləşən Kanaqava, Çiba və Saytama prefekturalarında qüvvədədir.
Yaponiya hökumətinin fövqəladə vəziyyət rejimini ləğv etməsinin səbəbləri sırasında həmin regionda səhiyyə sisteminin vəziyyətinin yaxşılaşması göstərilir. Bununla yanaşı, ölkə üzrə sutkalıq yeni yoluxma göstəricisinin təqribən eyni səviyyədə qalmaqda davam etdiyi bildirilir. Buna görə də, hökumət fövqəladə vəziyyət rejimini aradan qaldırsa da, restoranlardan və barlardan xidməti daha tez dayandırmağı, şirkətlərdən isə əməkdaşları məsafədən işə cəlb etməyi xahiş edir.
Eyni zamanda, böyük şəhərlərdə koronavirusa yoluxanların aşkar edilməsi üçün testlərin aparılacağı və yoluxmaya nəzarətin davam etdiriləcəyi bildirilir.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
