Yaponiya Orta Dəhlizin rəqəmsallaşdırılması layihəsinə qoşulur
Astana, 25 avqust, AZƏRTAC
Yaponiya hökuməti Orta Dəhliz istiqamətində yerləşən Aktau limanında gömrük xidmətlərinin rəqəmsallaşdırılmasına dəstəyini ifadə edib.
AZƏRTAC xəbər verir ki, bunu Astanada jurnalistlərə Qazaxıstan Baş nazirinin müavini - xarici işlər naziri Murat Nurtleu Yaponiya Xarici İşlər Nazirliyinin rəhbəri Takeşi İvaya ilə görüşdən sonra deyib.
Onun sözlərinə görə, ölkələr arasında hava nəqliyyatının genişləndirilməsi çərçivəsində gələn ildən birbaşa Almatı-Tokio reysinin açılması da planlaşdırılır.
Baş nazirin müavini əlavə edib: “Bundan başqa, nüvə energetikası, nüvə yanacağının istehsalı və ixracı, eləcə də nüvə təbabəti sahələrində əməkdaşlıq üçün böyük potensial var. Ölkəmiz yaşıl transformasiya və yüksək texnologiyalar üçün zəruri olan nadir və strateji əhəmiyyətli elementlərin zəngin ehtiyatlarına malikdir. Yaponiyada “yaşıl” texnologiyaların istehsalı üçün lazım olan 32 növ xammaldan 22-si məhz Qazaxıstanda hasil edilir”.
M.Nurtleu Yaponiya hökumətinə daşqından mühafizə sistemlərinin inkişafına yönəlmiş təmənnasız yardıma görə minnətdarlığını bildirib.
O vurğulayıb: “Yaponiya Asiya regionunda bizim etibarlı strateji tərəfdaşımızdır. Eyni zamanda, ikitərəfli münasibətlərin əsasını təbii ki, iqtisadi-ticari əməkdaşlıq təşkil edir. “İqtisadi güc” kimi tanınan Yaponiya Qazaxıstanın ən böyük on investorları sırasındadır. Doğan Günəş ölkəsindən Qazaxıstan iqtisadiyyatına 9 milyard dollar birbaşa investisiya cəlb edilib”.
Elşən Rüstəmov
AZƏRTAC-ın xüsusi müxbiri
Astana
Bölmənin digər xəbərləri
