Yaponiya və Cənubi Koreya liderləri arasında telefon danışığı olub
Tokio, 24 sentyabr, AZƏRTAC
Yaponiyanın Baş Naziri Yoşihide Suqa Cənubi Koreyanın Prezidenti Mun Ce-ini müharibə dövründə məcburi əməyə görə yaranmış diplomatik qarşıdurmanı aradan qaldırmaq üçün qəti addımlar atmağa çağırıb.
AZƏRTAC xəbər verir ki, bu barədə Yaponiyanın yeni Baş Naziri sentyabrın 24-də Cənubi Koreya lideri ilə baş tutan ilk telefon danışığını şərh edərkən bildirib.
Y.Suqa Mun Ce-ini Yaponiya ilə Cənubi Koreya arasında konstruktiv münasibətləri bərpa etməyə çağırıb.
Telefon danışığından sonra jurnalistlərlə görüşən Baş Nazir bu məsələdə sələfi Ş.Abenin sərt mövqeyini davam etdirəcəyini də bildirib.
Xatırladaq ki, iki ölkə arasında münasibətlər 2018-ci ilin oktyabrında Cənubi Koreya məhkəməsi Yaponiyanın polad istehsal edən şirkətinə dörd koreyalıya İkinci Dünya müharibəsi illərindəki məcburi əməyə görə kompensasiya ödəməsi barədə qərarından sonra pisləşib.
Rəsmi Tokionun mövqeyinə görə, bu qərar Yaponiya ilə Cənubi Koreya arasında 1965-ci ildə imzalanmış, kompensasiya məsələsinin tam və qəti şəkildə həll olunduğu razılaşma ilə ziddiyyət təşkil edir.
Baş Nazir jurnalistlərə deyib ki, o, məsələnin həlli üçün Cənubi Koreyanı müvafiq tədbirlər görməkdə qətiyyətli olmağa çağırıb.
Bununla yanaşı, Y.Suqa bildirib ki, Yaponiya və Cənubi Koreya vacib qonşular olduqlarından onlar ABŞ-la birlikdə Şimali Koreya probleminin həllinə çalışmalıdırlar.
Baş Nazir, həmçinin tərəflərin koronavirus pandemiyası dövründə iş adamlarının səfərləri ilə əlaqədar müvafiq addımların atılması barədə razılığa gəldiklərini də bildirib.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
