Yaponiyada koronavirusa yoluxanların ümumi sayı 81 mini ötüb
Tokio, 25 sentyabr, AZƏRTAC
Yaponiyanın hakimiyyət orqanlarının yaydığı məlumata görə, son sutka ərzində ölkə üzrə koronavirusa yoluxanların sayı daha 485 nəfər artıb. Bunlardan 195-nin Tokioda qeydə alındığı bildirilir.
AZƏRTAC xəbər verir ki, beləliklə Yaponiya üzrə koronavirusa yoluxanların ümumi sayı 81 min 315 nəfərə çatıb. Buraya ölkə aeroportlarında karantin yoxlamaları zamanı müəyyən edilənlər və cari ilin əvvəllərində “Diamond Princess” kruiz laynerində aşkar edilən 712 nəfər də daxildir.
Hakimiyyət orqanları, həmçinin daha 12 nəfərin həyatını itirdiyini bildirib. Beləliklə ölkə üzrə koronavirus pandemiyasından həyatını itirənlərin ümumi sayı 1550 nəfərə çatıb.
Yaponiya Səhiyyə, Əmək və Sosial Təminat Nazirliyinin yaydığı məlumata görə, hazırda 166 xəstənin vəziyyəti ağırdır.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
