YAPONİYADA SİQARET ALMAQ ÜÇÜN XÜSUSİ PASPORT VERİLƏCƏK

18.07.2004 [15:13]
Çap et
A⁺ A^-

AZƏRTAC-ın xarici informasiya agentliklərindən aldığı xəbərə görə, Yaponiyada küçə avtomatlarından siqaret almaq üçün şəxsiyyəti təsdiqləyən elektron kartoçkalar tətbiq ediləcək. Onları ölkənin ancaq yetkinlik yaşına çatan vətəndaşları ala bilərlər. Formaca adi kredit vərəqəsini xatırladan kartoçkada quraşdırılmış mikroçip ondan avtomatik ödəniş üçün “elektron pul kisəsi” kimi də istifadə etməyə imkan verir. Kartın həqiqi sahibinin şəxsiyyətini müəyyənləşdirmək üçün onun üstündə fotoşəkil olur.

Bu sistemin tətbiqinə səbəb odur ki, Yaponiya qanunları 20 yaşına çatmayan vətəndaşlara spirtli içkilər içməyi və siqaret çəkməyi qadağan edir. Ölkədə yeniyetmələrin getdikcə daha çox siqaretə aludə olması hökuməti radikal tədbir görməyə vadar etmişdir.

İnkişaf etmiş ölkələr arasında siqaret çəkmədə lider olan Yaponiya 2004-cü ilin martında Dünya Səhiyyə Təşkilatının tütünə nəzarət konvensiyasını imzalamışdır. Siqaretin reklamı iyundan qanunvericilik yolu ilə qadağan olunmuşdur. İndi isə küçədə tütün məhsulu satışına ciddi nəzarət qoyulur.

YAPONİYADA SİQARET ALMAQ ÜÇÜN XÜSUSİ PASPORT VERİLƏCƏK

MÜƏLLİFLƏ ƏLAQƏ

Bölmənin digər xəbərləri