Yaponiyaya Filippindən gəlmiş şəxsdə koronavirusun yeni ştammı aşkar edilib
Tokio, 13 mart, AZƏRTAC
Yaponiyaya fevralda Filippindən gəlmiş kişidə koronavirusun yeni ştammı aşkar edilib.
AZƏRTAC xəbər verir ki, bu barədə Kyodo agentliyi Yaponiyanın Səhiyyə, Əmək və Sosial Təminat Nazirliyinə istinadla məlumat yayıb.
Bildirilir ki, bu ştamm əvvəllər koronavirusun Böyük Britaniya, Cənubi Afrika Respublikası və Braziliyada aşkar edilmiş mutasiyaları qədər təhlükəlidir.
Xatırladaq ki, koronavirusun Böyük Britaniya ştammı aşkar edildikdən sonra Yaponiyada dünyanın bütün ölkələrinin və regionlarının vətəndaşlarına viza verilişi dayandırılıb. Bu qadağa ötən il dekabrın 28-də qüvvəyə minib. İlkin olaraq, onun yanvarın sonunadək qüvvədə olması nəzərdə tutulsa da, sonradan bu müddət fövqəladə vəziyyət rejimi ilə birlikdə martın 21-dək uzadılıb.
Qeyd edək ki, son məlumatlara görə, Yaponiyada ümumilikdə koronavirusa yoluxanların sayı 445 min nəfəri ötüb. Onlardan 8,4 mininin həyatını itirdiyi qeyd edilir.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
