Yaxın Şərqdə nüvə obyektlərinə təminat tədbirlərinin tətbiqi ilə bağlı qətnamə qəbul edilib
Qahirə, 18 sentyabr, AZƏRTAC
Beynəlxalq Atom Enerjisi Agentliyinin (BAEA) ümumi konfransının 70-ci sessiyasında agentliyin təminat tədbirlərinin Yaxın Şərqdəki bütün nüvə obyektlərinə tətbiq olunmasına dair qətnamə qəbul edilib.
AZƏRTAC xəbər verir ki, Misir Xarici İşlər Nazirliyinin mətbuat xidmətindən verilən məlumata görə, sənəd 112 üzv ölkənin dəstəyini qazanıb.
Qeyd olunub ki, qətnamə BAEA-nın təminat sisteminin Yaxın Şərqin bütün ölkələrinə və onların istisnasız olaraq bütün nüvə obyektlərinə tətbiq olunmasını, həmçinin regionda nüvə silahından və digər kütləvi qırğın silahlarından azad zonanın yaradılmasını nəzərdə tutur.
Konfransda Nüvə Silahlarının Yayılmaması Müqaviləsinin istisnasız tətbiqinə də çağırış edilib.
Şıxəli Əliyev
AZƏRTAC-ın xüsusi müxbiri
Qahirə
Bölmənin digər xəbərləri
