Azərbaycan ərazisindəki tarixi və dini abidələrin mübahisələndirilməsi cəhdləri absurddur – ŞƏRH
Bakı, 18 sentyabr, AZƏRTAC
Azərbaycanda akkreditə olunmuş diplomatik korpusun nümayəndələrindən ibarət olan heyətin Qarabağa və Şərqi Zəngəzura reallaşdırılan səfəri böyük rezonans doğurub. Bu, 2020-ci ildən sonra diplomatik korpus təmsilçilərinin işğaldan azad edilmiş ərazilərə 22-ci səfəridir. Səfərdə çox sayda diplomatın iştirak etməsi, onların verdikləri açıqlamalar və fəaliyyətlər Ermənistanın daxilində ciddi reaksiyaya, radikalların təşvişinə səbəb olub.
Bunu AZƏRTAC-a açıqlamasında siyasi şərhçi Mübariz Göyüşlü bildirib.
O vurğulayıb ki, Ermənistanın ictimai-siyasi dairələri və erməni diasporunun təmsilçiləri səfəri və diplomatik nümayəndələrin Qarabağda mədəni irs obyektlərini ziyarət etməsini anlaşılmaz səbəbdən narahatlıqla qarşılayıb, hay-küy qaldırıblar. Halbuki bu səfərin, onun nəticələrinin Ermənistana heç bir aidiyyəti yoxdur. Çünki söhbət Azərbaycanın suverenliyi və ərazi bütövlüyü çərçivəsində həyata keçirilən səfərdən gedir. Ermənistanda səfərə etiraz edənlərin bununla nəyə nail olmaq istədikləri isə sual doğurur.
“Bir az daha əvvələ gedərək yaddaş problemi yaşayan ermənilərə xatırlatmaq istərdik ki, Qarabağ Azərbaycanın ayrılmaz tərkib hissəsi olub və bu gün də belədir. 30 illik işğal bu statusu dəyişdirə bilməz. Elə torpaqlar işğal olunan zaman da BMT Təhlükəsizlik Şurasının qəbul etdiyi 822, 853, 874 və 884 saylı qətnamələrdə bu məsələlər əksini tapmışdı. Bu baxımdan Azərbaycanın öz ərazisində xarici diplomatları qəbul etməsi hansısa bir hüquqi uyğunsuzluq yarada bilməz”, - deyə Mübariz Göyüşlü diqqətə çatdırıb.
Siyasi şərhçi deyib ki, Qarabağda hansısa erməni irsindən, onunla bağlı olan məsələlərdən bəhs edən erməni diasporu yaranmış yeni reallıqları qəbul edə bilmir, ermənilərin 2023-cü ildə Qarabağdan köçməsi ilə bağlı təhrif olunmuş məlumatlar səsləndirilir: “Ancaq bu şəxslərə də yaxşı məlumdur ki, həmin vaxt ermənilər Azərbaycanın çağırışlarına baxmayaraq, Qarabağda qalmağa razı olmadılar. Bütün bu reallıqlara və faktlara baxmayaraq, Ermənistandakı revanşistlərin, radikalların hay-küy qoparması göstərir ki, onlar sülh istəmir, iki xalqın dinc şəraitdə yaşamasını qəbul edə bilmirlər”.
Mübariz Göyüşlü bildirib ki, Azərbaycanın suveren ərazisinə diplomatik korpusun səfəri mübahisə predmeti ola bilməz. “Bu məsələni mübahisələndirənlər bölgəni qana çalxalamaq istəyənlərdir, Azərbaycanla Ermənistan arasında müharibənin yenidən başlanmasını arzulayanlardır. Ümumiyyətlə, Azərbaycan ərazisindəki tarixi və dini abidələrin kimə məxsus olması məsələsini mübahisələndirmək cəhdləri absurddur. Bu abidələr Azərbaycan xalqının tarixi-mədəni irsinin tərkib hissəsidir. Bu mövzunun da ermənilərə heç bir aidiyyəti yoxdur”, - deyə o qeyd edib.
Siyasi şərhçi hesab edir ki, bu cür kampaniyaların arxasında Ermənistanın Baş naziri Nikol Paşinyanın dayandığını ehtimal etmək olar: “Sülh istədiyini yalnız sözdə deyən hazırkı hökumət başçısı və onun komandasının üzvləri bu yolla prosesi pozmağa çalışırlar. Onlar hansısa qrupların vasitəsilə Azərbaycanın suveren ərazisi olan Qarabağa iddiasının bitmədiyini nümayiş etdirirlər. Lakin durum dəyişib, artıq Azərbaycan 30 il əvvəlki kimi çətinliklər məngənəsində sıxılan ölkə deyil. İndi fərqli vəziyyət mövcuddur - güclü Azərbaycan var. Bu vəziyyəti Azərbaycan dövləti, xalqı və onun lideri, Prezident İlham Əliyev yaradıb. Ermənistanın bu reallıqları qəbul etməsi lazımdır. Reallıq isə budur ki, səfərlərin davamı, səfirlərin dəstəyi bundan sonra da olacaq. Azərbaycan Qarabağda və Şərqi Zəngəzurda quruculuq işlərini görməkdə, bölgəni inkişafa doğru aparmaqda davam edəcək”.
Mübariz Göyüşlü yekun olaraq deyib ki, Qarabağa diplomatik səfər Azərbaycanın ərazisində həyata keçirilən tədbirdir. Bu səfərin Ermənistan daxilində mübahisə doğurması həmin ərazinin hüquqi statusunu dəyişmir. Erməni radikallarının isə baş verənləri mübahisələndirməyə çalışması Ermənistan cəmiyyətində Qarabağ məsələsinin hələ də tam bağlanmış mövzu olmadığını, onların sülh istəmədiyini göstərən faktordur.
Bölmənin digər xəbərləri
