Yaxın Şərqdə sülhə mane olan qüvvələrdən biri və elə birincisi İrandır – Rəy
Bakı, 6 aprel, AZƏRTAC
Hər hansı bir dövlət başqa bir ölkəni müəyyən siyasi addımlarına görə qınaq obyekti etməzdən əvvəl öz əməllərini nəzərdən keçirməlidir ki, qarşı tərəfdən gələn tutarlı cavablara duruş gətirə bilsin, aciz duruma düşməsin. Son zamanlar ağzınlaşan İran diplomatiyası bütün hədləri aşaraq geri dönüşü olmayan bir vəziyyət yaradır. Vaxtilə işğaldan əziyyət çəkən ölkə kimi Azərbaycan İrandan fərqli olaraq, atdığı addımlarda ədalət və sülhün təməl prinsiplərini rəhbər tutub. İran isə 30 il ərzində nəinki Ermənistanın işğalçılıq siyasətinə göz yumub, hətta Qarabağın talan olunmasında da fəal iştirak edib. İslam dəyərlərinə həqiqətən hörmət bəsləyən, sözündə və əməlində dinin sütunlarına söykəndiyini bəyan edən bir dövlət Ermənistanla heç bir əlaqə qurmamalı idi. Sözdə müsəlman dövlət olan İran Qarabağda və Ermənistanda dini abidələrin, məscidlərin və müsəlman qəbirlərinin dağıdılması ilə əlaqədar olaraq bir dəfə də olsun Ermənistana çağırış etməyib, əksinə, İran-Ermənistan münasibətləri yüksələn xətlə irəliləyib. Uzun sözün qısası, Ermənistana hər sahədə yardım edən, işğalçı dövlətin bütün bəşəriyyətə zidd əməllərinə haqq qazandıran dövlətlərdən biri də elə İrandır.
Bu fikirləri AZƏRTAC-a açıqlamasında politoloq Tural Əliyev söyləyib.
Politoloq bildirib ki, Azərbaycan regionda, İslam dünyasında gedən prosesləri, reallıqları nəzərə alaraq İsraillə qarşılıqlı anlaşma formasında bu ölkədə səfirliyini açmırdı. İran isə bu diplomatik, siyasi jestləri doğru-dürüst qiymətləndirə bilmədi, təcavüzkar siyasət aparan dövlətlərin yanında olmağa qərar verdi. Siyasət təkcə qanunlara, beynəlxalq mexanizmlərə əsaslanmır, onun qayəsini həm də əxlaq normaları təyin edir. Azərbaycanın paralel şəkildə həm İsraildə səfirlik, həm də Fələstində nümayəndəlik açması hər iki tərəfin müsbət reaksiyası ilə qarşılandı. Fələstinin adından danışmaq isə İran parlamentinin səlahiyyətlərindən kənara çıxdığının əyani sübutudur.
T.Əliyevin fikrincə, bütövlükdə Yaxın Şərqdə gedən prosesləri incələyən zaman sülhə mane olan və hər cür destruktiv fəaliyyətləri həyata keçirən qüvvələrdən birinin və elə birincisinin İran və molla rejiminin apardığı siyasət olduğunu aydın şəkildə görmək olar. Suriyada, Fələstində, Livanda, İraqda və digər ölkələrdə İrana bağlı proksitəşkilatlar molla rejiminin direktiv göstərişlərini yerlərdə icra edirlər. Burada ortaya məntiqli sual çıxır: İran Cənubi Qafqaz və Yaxın Şərq regionlarında sabitliyə təhdid yaradarkən, hansı haqla, hüquqla Azərbaycanı əsası olmayan fikirlərlə tənqid edir? Ətrafında İranı dəstəkləyən dövlət varmı? Xeyr! Bunun səbəbləri özlərinə də bəllidir. Əbəs yerə Azərbaycanı hədəf seçib bir daha gülünc vəziyyətə düşməmək üçün İran öz siyasətində dəyişiklik etməlidir. Digər tərəfdən, İran hakimiyyəti və parlamenti Azərbaycan əleyhinə bəyanatlar səsləndirərkən yerli azərbaycanlılar arasında da öz dayaqlarını itirməyə doğru gedir. Görünür, dini-teokratik rejim azərbaycanlılar amilini yaddan çıxarır.
“Tarix səbəb və nəticələri üzə çıxarmaqla yanaşı, növbəti səhvlərdən də sığortalanmaq üçün bir şans yaradır. Bu zaman ən doğru addımlar keçmişdən dərs çıxarmaqdır. Çünki həqiqəti unudanlar tarixin sınaqlarından keçə bilmirlər", - deyə T.Əliyev vurğulayıb.
Bölmənin digər xəbərləri
