Yeni komando hərbi hissəsinin açılışı Ordumuzun hazırkı mükəmməl vəziyyətini göstərdi
Bakı, 24 iyun, AZƏRTAC
Torpaqlarımız Ermənistan tərəfindən işğal olunanda bəzi dövlətlər və beynəlxalq təşkilatlar məsələnin sülh yolu ilə həll edilməsinin vacibliyindən danışırdılar. Eyni zamanda, bizə məcbur edirdilər ki, münaqişənin ancaq sülh vasitəsilə həll edəcəyimizə dair öhdəlik götürək. Əlbəttə, Azərbaycan məsələnin sülh yolu ilə həll edilməsində maraqlı idi və bu istiqamətdə 30 ilə yaxın danışıqlar apardı. Lakin ordu quruculuğu işini də paralel şəkildə aparırdı. Beynəlxalq təşkilatların Ermənistanın işğal siyasətini pisləyən, torpaqlarımızı azad etməsini tələb edən qərar və qətnamələrinin icra olunmaması, ermənilərin “yeni müharibə, yeni torpaqlar” avantürası Azərbaycan Ordusunu hərəkətə keçməyə məcbur etdi. Nəticədə beynəlxalq təşkilatların qətnamələri icra olunmaqla, beynəlxalq hüquq və ərazi bütövlüyümüz təmin olundu. Bütün dünya hərbi gücün münaqişələrin həll olunmasında, beynəlxalq hüququn prinsiplərinin icra olunmasında oynadığı rolun da şahidi oldu.
Bu fikirləri AZƏRTAC-a açıqlamasında Ana Vətən Partiyası sədrinin müavini, politoloq Yalçın Hacızadə söyləyib.
O bildirib ki, Qarabağ Zəfərindən sonra Azərbaycan Ermənistana sülh təklif etdi. Amma bununla yanaşı, Prezident İlham Əliyev Azərbaycan Ordusunun yenidən formalaşdırılması, yeni hərbi birliklərin yaradılması tapşırığını vermişdi. Keçən qısa müddət ərzində də bu istiqamətdə böyük dəyişikliklər edilərək, ordunun peşəkarlardan qurulması, yeni müasir silah və texniki qurğuların alınması həyata keçirilib. Azərbaycan dünyada və regionda mövcud vəziyyətləri nəzərə alaraq ordu quruculuğunu sürətlə inkişaf etdirir. Dövlətimizin başçısı dəfələrlə çıxışlarında bildirib ki, “dünya indi beynəlxalq hüquqdan daha çox gücə üstünlük verir”. Ona görə də biz öz Ordumuzu çox güclü vəziyyətə gətirməklə, dünyanın ən güclü orduları sırasına qaldıracağıq.
“Azərbaycan Prezidentin iştirakı ilə yeni komando hərbi hissəsinin açılışı da Ordumuzun gəldiyi son vəziyyəti göstərir. Prezident İlham Əliyev Silahlı Qüvvələrin şəxsi heyəti qarşısında çıxışı zamanı Ermənistan və onun havadarlarına bildirdi: “Bundan sonra da Ordumuzun daha da gücləndirilməsi üçün bütün lazımi tədbirlər görüləcək. Azərbaycanın düşmənləri bunu bilir, görür, bilməlidir və görməlidir. Məhz buna görə bizə qarşı edilən istənilən təxribat cavabsız qalmır, hər bir təxribata layiqli cavab verilir, istər hərbi cavab, istər siyasi cavab”. Bilirik ki, Ali Baş Komandanın belə çıxışları Ermənistanda və ona dəstək verənlər tərəfindən diqqətlə izlənilir və geniş müzakirələrə səbəb olur.
Həm Ermənistan, həm də maraqlı qüvvələr anlayıblar ki, Prezident İlham Əliyev dediyini və məqsədini həyata keçirən rəhbərdir. Azərbaycanın əldə etdiyi siyasi, iqtisadi və hərbi imkanlar da bunları həyata keçirməyə, istənilən təxribatların qarşısını almağa qadirdir. Hansısa dövlətin, təşkilatın nə deməsindən, bəyanat verməsindən asılı olmayaraq, Azərbaycan dövləti məqsədlərinə çatır və bu istiqamətdə ona kimsə təsir edə bilməz”, - deyə politoloq əlavə edib.
Bölmənin digər xəbərləri
