“Xəzərdənizneftqaztikinti” Trestinin dəmir-beton məmulatı zavodunda Neft daşları və “Bahar” yataqlarından sahilə çəkiləcək ikinci sualtı qaz kəməri üçün nəzərdə tutulan borulara beton üzlük çəkilməsinə başlanmışdır.

Azərbaycan Dövlət Neft Şirkətinin mətbuat xidmətindən AZƏRTAC-a bildirmişlər ki, yeni qaz kəməri üçün yüksək təzyiqə və korroziyaya davamlı 20 düyümlük borular da, üzlük materiallar da xarici ölkələrdən gətirilmişdir.

Artıq 7 min metr boruya beton üzlük çəkilmişdir. Kəmərin bütün borularının üzlənməsinə isə təxminən 4 ay yarım vaxt lazımdır.

Yataqlardan sahilə qədər uzanacaq 68 kilometrlik kəməri Azərbaycan Dövlət Neft Şirkəti öz qüvvəsi ilə çəkəcəkdir. Sutkada 5-5,5 milyon kubmetr həcmində mavi yanacaq nəql edəcək yeni kəmər ilin sonunadək istifadəyə veriləcəkdir.