Yevlaxda konsert və möhtəşəm atəşfəşanlıq VİDEO
Yevlax, 23 dekabr, AZƏRTAC
Xalqımız üçün əlamətdar günlərlə bol olan dekabr ayında Yevlaxda bayram ab-havası hökm sürür.
AZƏRTAC-ın bölgə müxbiri xəbər verir ki, Yevlaxda yeni salınan əyləncə parkında şəhər icra hakimiyyətinin təşkilatçılığı ilə konsert proqramı keçirilib. Tədbirdə son illərdə Yevlax şəhərində aparılan geniş abadlıq və quruculuq işləri haqqında məlumat verilib. Bildirilib ki, şəhərin mərkəzində “Dədə Qorqud” parkı yenidən qurulub, ərazisi 1,95 hektara çatdırılıb və Dədə Qorqudun heykəli quraşdırılıb. Şəhərdə bir sıra çoxmənzilli yaşayış binaları təmir edilib, həyətlərində abadlıq işləri görülüb. Nizami parkında əsaslı təmir olunub. Heydər Əliyev Sarayında müasir memarlıq qaydalarına uyğun olaraq əsaslı təmir işləri həyata keçirilib. Kino-park yenidən qurulub və uşaqların əylənməsi üçün qurğular, yaşlıların istirahəti skamyalar quraşdırılıb, tamaşa zalı yaradılıb. Şəhidlər xiyabanında əsaslı təmir işləri aparılıb.
2019-2021-ci illərdə Yevlaxda 13 məktəb binası cari və ya əsaslı təmir olunub, 2 modul tipli məktəb binası quraşdırılıb, Qoyunbinəsi kəndində 432 şagird yerlik yeni məktəb binası tikilib istifadəyə verilib. Yevlax şəhərində 4 ədəd körpələr evi-uşaq bağçası əsaslı təmir edilib. Nizami prospektində barak tipli binalarda yaşayan ailələr üçün 45 mənzilli 9 mərtəbəli yaşayış binasının tikintisi başa çatdırılıb və ailələr həmin binaya köçürülüb.
Şəhərin küçə və meydanlarında müasir tipli 226 ədəd yeni işıqlandırma dirəkləri quraşdırılıb, Xaldan-Zaqatala avtomobil yolunun 6 kəndi birləşdirən Xaldan-Ərəş-Meyvəli kəndlərarası, həmçinin Qaroğlan, Quşçu, Malbinəsi və Qoyunbinəsi kəndlərarası 19,6 kilometr uzunluğunda avtomobil yolları əsaslı təmir olunaraq asfaltlanıb. Ümumilikdə, Yevlax rayonunda mövcud 127 kilometr kəndlərarası avtomobil yollarının 92,6 kilometri asfaltlanıb ki, bu da ümumi yolların 73 faizini təşkil edir. Cari ildə Xaldan kəndində magistral şose üzərində piyadalar üçün körpü, İncə çayı üzərində 12 kəndi birləşdirən yolda dəmir beton konstruksiyalı körpü tikilib istifadəyə verilib. 2021-ci ildə Yevlax rayonunun bütün yaşayış məntəqələri təbii qaz ilə təmin olunub.
Rayonda kənd təsərrüfatı məhsullarının istehsalının artırılması da diqqət mərkəzində olub. Rayonun Aran qəsəbəsi ərazisində “Aqro Park” yaradılıb. “Aqro Park” heyvandarlıq, əkinçilik, bağçılıq məhsulları və emalı istiqamətində fəaliyyət göstərəcəkdir. Burada 320 nəfər Yevlax sakininin daimi işlə təmin edilməsi nəzərdə tutulub.
“Azərşəkər” MMC-yə Yevlax rayonun ərazisində ayrılan 2000 hektar ərazidə 7 kilometr beton kanal tikilib, 39 ədəd müasir suvarma sistemi yağış yağdırma qurğuları quraşdırılıb.
Konsert proqramında tanınmış müğənnilərin ifasında rəngarəng musiqi nömrələri təqdim olunub. Konsertin sonunda yevlaxlılar gündən-günə inkişaf edən, gözəlləşən şəhərlərinin səmasını al-əlvan rənglərə boyayan bayram atəşfəşanlığını böyük maraqla seyr ediblər.
Bölmənin digər xəbərləri
