“Yüksək fiziki aktivlik–sağlamlığın qarantıdır!” adlı aksiya keçirilib
Bakı , 2 oktyabr, AZƏRTAC
Bu gün “ASAN xidmət”, İctimai Səhiyyə və İslahatlar Mərkəzi və Azərbaycan Tibb Universitetinin “Yüksək fiziki aktivlik-sağlamlığın qarantıdır!” adlı birgə layihəsi çərçivəsində aksiya keçirilib.
Universitetin mətbuat xidmətindən AZƏRTAC-a bildiriblər ki, ATU-nun ictimai sağlamlıq və səhiyyənin təşkili kafedrasının doktorantı İlahə İslamzadənin sözlərinə görə, 1saylı ASAN xidmətdə keçirilən aksiya zamanı gün ərzində müraciət edən bütün vətəndaşlar məlumatlandırılıb, onlara broşürlər verilib.
İ.İslamzadə deyib: “Aparılan araşdırmalar göstərir ki, ölkəmizə əhali arasında fiziki aktivlik ürəkaçan səviyyədə deyil. Fiziki aktivliyin aşağı səviyyədə olmasının səbəblərindən biri də əhalinin bu sahə üzrə lazımi qədər məlumatlı olmamasıdır. Bununla əlaqədar, belə bir maarifləndirici aksiya keçirmək qərarına gəldik. Bu gün ərzində ASAN xidmətə müraciət edən vətəndaşlara bukletlər verilib, maraqlandıran suallar cavablandırılır”.
Qeyd edək ki, aksiya 2015-ci il dekabrın 23-də “Qeyri-infeksion xəstəliklərlə mübarizəyə dair Dövlət strategiyası”na əsasən həyata keçirilir. Məlum olduğu kimi, dünyada vaxtsız ölüm hallarının 3/2 hissəsi qeyri-infeksion xəstəliklərinin payına düşür. Qeyri-infeksion xəstəliklərin yaranma səbəblərindən biri də fiziki aktivliyin zəif olması ilə əlaqədardır.
Bölmənin digər xəbərləri
