Zakir Həsənov: Düşmən təxribatlarının qarşısı qətiyyətlə alınacaq
Bakı, 16 oktyabr, AZƏRTAC
Torpaqlarımızın işğalı davam etdikcə düşmən təxribatlarının qarşısı qətiyyətlə alınacaq və ona vurulan sarsıdıcı zərbələr davamlı olacaq. Silahlı Qüvvələrdə həyata keçirilən tərbiyəvi iş də bu istiqamətə yönəldilməlidir.
Bu sözləri oktyabrın 16-da müdafiə naziri, general-polkovnik Zakir Həsənov Silahlı Qüvvələrin şəxsi heyət üzrə rəhbər zabit heyətinin nümayəndələri ilə görüşdə deyib.
Müdafiə Nazirliyinin mətbuat xidmətindən AZƏRTAC-a bildiriblər ki, nazir son vaxtlar dövlət rəhbərliyi səviyyəsində ordu quruculuğunun inkişaf etdirilməsi istiqamətində həyata keçirilən ardıcıl tədbirlərdən, Azərbaycan Prezidenti, Ali Baş Komandan İlham Əliyevin diqqət və qayğısı nəticəsində Silahlı Qüvvələrdə görülən irimiqyaslı quruculuq işlərindən danışıb. Torpaqlarımızın işğaldan azad edilməsinin ordunun ən əsas vəzifəsi olduğunu vurğulayan nazir bildirib ki, Silahlı Qüvvələrimiz qarşıya qoyulan bu müqəddəs borcu yerinə yetirməyə tam hazır və qadirdir.
“Müasir dövrdə ölkənin hərbi potensialının artırılması üçün atılan addımlar göz qabağındadır”, - deyən general-polkovnik Z.Həsənov vurğulayıb ki, Azərbaycan ordusu ən müasir silah-sursat və hərbi texnika ilə təmin edilib. Bu gün Azərbaycan Silahlı Qüvvələri üçün müasir silahlar, hərbi texnikalar alınır, yeni hərbi şəhərciklər tikilərək şəxsi heyətin istifadəsinə verilir. İlin sonunadək müxtəlif bölgələrdə də hərbi hissələr tikiləcək. Məqsəd əsgər və zabitlərin müasir şəraitdə xidmətini təmin etməkdir. Bütün bunlar deməyə əsas verir ki, ordu quruculuğunun inkişaf etdirilməsi prioritet məsələlərdən biridir.
“Nazirlər Kabinetinin 2015-ci ilin doqquz ayının sosial-iqtisadi inkişafının yekunlarına və qarşıda duran vəzifələrə həsr olunmuş iclasında çıxışı zamanı Prezident İlham Əliyev bir daha vurğulayıb ki, ordu quruculuğu daim diqqət mərkəzindədir və növbəti ildə də ordunun inkişafı üçün lazım olan bütün tədbirlər görüləcək. Dövlətin orduya göstərdiyi yüksək diqqət və qayğıya cavab olaraq hər bir zabit üzərinə düşən vəzifə borcunu böyük məsuliyyət hissi ilə yerinə yetirməlidir.
Bilavasitə şəxsi heyətin təlim-tərbiyəsinə cavabdehlik daşıyan zabit olaraq bu sahədə sizin üzərinizə də böyük məsuliyyət düşür. Orduda şəxsi heyətlə bağlı bütün məsələlərə müdaxilə edərək fikrinizi, mövqeyinizi bildirməlisiniz. Heç kimə sirr deyil ki, ordu xalqın, cəmiyyətin ayrılmaz hissəsidir. Xalq orduda baş verən bütün hadisələri dəqiqliklə izləyir, aparılan islahatlara və görülən işlərə qiymət verir. Unutmayın ki, qısa vaxt ərzində orduda həyata keçirilmiş yenilikləri xalq görür və bizə inanır. Biz isə bu inamı layiqincə doğrultmalıyıq”, - deyə general-polkovnik Z.Həsənov əlavə edib.
İşğal altında olan Azərbaycan ərazilərinin qısa bir zamanda ordunun gücü ilə azad ediləcəyinə əminliyini ifadə edən müdafiə naziri bildirib: “Şəxsi heyətlə iş üzrə bölmələrin zabitləri hərbi kollektivdə tərbiyə işinə nail olmaq üçün ilk növbədə özləri nümunə olmalıdırlar. Bu sahəyə cavabdeh olan şəxs hərbi biliyi, nizam-intizamı və davranışı ilə şəxsi nümunə olmağı bacarmalıdır. Gördüyü işlə şəxsi heyəti ordunun qarşısında dayanan ən mühüm vəzifənin uğurla yerinə yetirilməsinə səfərbər etməlidir. İstənilən hadisənin vaxtında, qabaqcadan qarşısını almağa hazır olun. Vaxtında profilaktik tədbirlər görün, xalqın gücündən, inamından istifadə edin, vətənpərvərlik tədbirləri keçirin”.
“Ordu ilə cəmiyyət arasında əlaqələrin qurulmasına ciddi fikir verilməlidir və bu sahədə də hamıdan əvvəl şəxsi heyət üzrə cavabdeh zabitlərin üzərinə yük düşür”, - deyən müdafiə naziri general-polkovnik Z.Həsənov tövsiyə edib ki, dövlətin orduya münasibəti, orduda aparılan islahatlara Ali Baş Komandan tərəfindən verilən güclü dəstək şəxsi heyət arasında yetərincə təbliğ olunmalıdır. Hər bir əsgər nümunəvi, intizamlı olmaqla Vətən qarşısında borcunun məsuliyyətini dərindən dərk etməlidir. Bu gün xalqımız Silahlı Qüvvələrə güvənir, onun keşiyində ayıq-sayıq dayanan əsgər düşmənə qarşı döyüşə hazırdır və bu döyüşlərdə öz sözünü qətiyyətlə deyəcək.
Silahlı Qüvvələrimizin qarşısında duran vəzifələrin layiqincə icra edilməsi üçün hər bir zabitin öz vəzifə borcuna bundan sonra da məsuliyyətli olacağına inandığını qeyd edən müdafiə naziri diqqətə çatdırıb ki, şəxsi heyət xalqın və dövlətin etimadını doğrultmaq üçün bütün vəzifə və tapşırıqların öhdəsindən layiqincə gəlməlidir.
Bölmənin digər xəbərləri
