Zaqatalada qumbaranın partlaması nəticəsində iki nəfərin ölməsi ilə bağlı cinayət işi başlanılıb
Bakı, 2 oktyabr, AZƏRTAC
Zaqatala rayonunda qumbaranın partlaması nəticəsində iki nəfərin ölməsi faktı ilə bağlı cinayət işi başlanılıb.
Bu barədə AZƏRTAC-a rayon prokurorluğundan məlumat verilib.
Belə ki, sentyabrın 30-da Zaqatala rayonunun Yengiyan kəndində baş vermiş partlayış nəticəsində bir nəfərin ölməsi barədə rayon prokurorluğuna məlumat daxil olub.
Araşdırmalar nəticəsində 1994-cü il təvəllüdlü Həmid Gülməmmədovun qeyd edilən tarixdə Məqsəd Rzayev və İlqar Cumayevlə aralarında yaranmış mübahisə zamanı üzərindəki əl qumbarasını atması nəticəsində baş verən partlayışla əlaqədar aldığı xəsarətlərdən ölməsi, Məqsəd Rzayevin isə növbəti gün müalicə aldığı xəstəxanada ölməsinə əsaslı şübhələr müəyyənləşdirilib.
Fakta görə, Zaqatala Rayon Prokurorluğunda Cinayət Məcəlləsinin 120.1-ci, (qəsdən adam öldürmə) 29, 120.2.7-ci (iki və ya daha çox şəxsi qəsdən öldürməyə cəhd) və 228.1-ci (qanunsuz olaraq döyüş sursatı və partlayıcı maddələri saxlama, daşıma və ya gəzdirmə) maddələri ilə cinayət işi başlanaraq istintaq davam aparılır.
Bölmənin digər xəbərləri
