Zaqatalada Şıxəli Qurbanovun 100 illik yubileyi qeyd olunub
Zaqatala, 15 mart, Mustafa Dadaşov, AZƏRTAC
Zaqatalada Şıxəli Qurbanovun adını daşıyan şəhər 3 nömrəli tam orta məktəbində görkəmli şair, dramaturq və ictimai-siyasi xadimin anadan olmasının 100 illiyi münasibətilə tədbir keçirilib.
Tədbirdə Şəki-Zaqatala Regional Təhsil İdarəsinin, Zaqatala rayon təhsil sektorunun rəhbər şəxsləri, YAP rayon təşkilatının nümayəndələri, şəhid ailələrinin üzvləri, məktəbin kollektivi, ziyalılar iştirak ediblər.
Regional Təhsil İdarəsindən AZƏRTAC-ın bölgə müxbirinə bildirilib ki, tədbir Dövlət Himninin səsləndirilməsi ilə başlayıb, şəhidlərin xatirəsi bir dəqiqəlik sükutla yad edilib.
Yubiley tədbirində Şəki-Zaqatala Regional Təhsil İdarəsinin müdiri Günay Mahmudova çıxış edərək, Şıxəli Qurbanovun Azərbaycan ədəbiyyatına, dramaturgiyasına və ictimai fikrinin inkişafına verdiyi töhfələrdən danışıb. İdarə müdiri Ş.Qurbanovun maarifçilik fəaliyyətini, ana dilinin inkişafı və milli dəyərlərin qorunması uğrunda mübarizəsini xüsusi vurğulayıb, onun irsinin bu gün də gənc nəsil üçün örnək olduğunu bildirib.
Tədbirdə çıxış edənlər Şıxəli Qurbanovun yaradıcılığının və ictimai fəaliyyətinin əhəmiyyətindən bəhs edərək, onun irsinin Azərbaycan ədəbiyyatında və ictimai fikrində mühüm rol oynadığını vurğulayıblar. Qeyd olunub ki, Ş.Qurbanovun milli-mənəvi dəyərlərə və maarifçilik ideyalarına əsaslanan fəaliyyəti gənc nəslin tərbiyəsində mühüm istiqamət təşkil edir.
Tədbir çərçivəsində məktəb şagirdlərinin təqdimatında Şıxəli Qurbanovun əsərləri əsasında hazırlanmış səhnəciklər nümayiş etdirilib, şairin şeirləri səsləndirilib, musiqi nömrələri ifa olunub.
Qeyd edək ki, Zaqatala şəhər 3 nömrəli tam orta məktəbi 1968-ci ildən Şıxəli Qurbanovun adını daşıyır.
Bölmənin digər xəbərləri
