Zaqatalada “Xocalı - qəm ocağı” mövzusunda tədbir keçirilmişdir
Zaqatala, 22 fevral (AZƏRTAC). Xocalı faciəsinin 21-ci ildönümü ilə əlaqədar Zaqatala rayonunun mədəniyyət müəssisələrində silsilə tədbirlər davam edir.
AZƏRTAC xəbər verir ki, fevralın 22-də Rayon Mərkəzləşdirilmiş Kitabxana Sisteminin Nizami adına mərkəzi kitabxanasında “Xocalı- qəm ocağı” mövzusunda tədbir keçirilmişdir.
Tədbir iştirakçıları əvvəlcə kitabxananın foyesində “Xocalı əbədiyyəti” adlı kitab sərgisinə baxmışlar.
Xocalı faciəsi qurbanlarının, eləcə də Vətənimizin azadlığı uğrunda şəhid olanların xatirəsi bir dəqiqəlik sükutla yad edilmişdir.
Ziyalıların, rayonda fəaliyyət göstərən ali və orta ixtisas məktəbləri tələbələrinin, məktəblilərin iştirak etdikləri tədbirdə kitabxananın direktoru Gülnigar Məmmədova Xocalı faciəsinin bəşər tarixində insanlığa qarşı ən qanlı cinayətlərdən biri olduğunu bildirmiş, faciənin səbəbləri, mahiyyəti və acı nəticələri barədə danışmışdır.
Çıxışlarda vurğulanmışdır ki, 21 il əvvəl, 1992-ci il fevralın 25-dən 26-na keçən gecə Xocalıda baş verənlər Azərbaycan xalqının yaddaşından heç zaman silinməyəcəkdir. Həmin gecə erməni cəlladları keçmiş sovet ordusunun hərbi birləşmələrinin köməyi ilə bütün dünyanın gözü qarşısında Xocalıda misli görünməmiş soyqırımı hadisəsi törətmiş, heç bir günahı olmayan yüzlərlə dinc insanı qətlə yetirmişlər.
Qeyd olunmuşdur ki, bu qətliam erməni millətçilərinin Azərbaycan xalqına qarşı yürütdüyü soyqırımı və etnik təmizləmə siyasətinin tərkib hissəsidir. Bu məkrli siyasət indi də davam edir.
Tədbirin sonunda məktəblilərin hazırladıqları ədəbi-bədii kompozisiya nümayiş etdirilmişdir.
Bölmənin digər xəbərləri
