Zeki Gül: Türkiyə Güləş Federasiyası olaraq hər zaman azərbaycanlı qardaşlarımızın yanındayıq
Bakı, 9 dekabr, AZƏRTAC
Sərbəst güləş üzrə yığmamız fərdi dünya kubokuna Türkiyədə hazırlığı davam etdirir.
AZƏRTAC xəbər verir ki, komandamız Türkiyənin həm sərbəst, həm də yunan-Roma güləşi üzrə millilərinin toplanış keçdiyi Almadağ təlim-məşq bazasında hazırlıq keçir. Güləşçilərimiz baş məşqçi Namiq Abdullayev və böyük məşqçi Zəlimxan Hüseynovun rəhbərliyi ilə plana uyğun şəkildə məşqləri davam etdirirlər.
Türkiyə Güləş Federasiyasının (TGF) vitse-prezidenti Zeki Gül təlim-məşq bazasına baş çəkib və komandamızla görüşüb. Millimizə hədiyyələr təqdim edən TGF rəsmisi deyib: "Olimpiadalarda, Avropa və dünya çempionatlarında şahid oldum ki, azərbaycanlı güləşçilər türkiyəli idmançıların uğurlarına öz qələbələri kimi sevinirlər. Biz də Azərbaycanın hər idmançısının uğuru ilə qürur duyuruq. Türkiyə Güləş Federasiyası olaraq hər zaman azərbaycanlı qardaşlarımızın yanındayıq. Bu birlik bundan sonra daha da güclənəcək. Bildiyiniz kimi dünya çempionatı ləğv olundu. Təlim-məşq toplanışı dekabrın 12-18-də Serbiyada keçiriləcək fərdi dünya kubokuna hazırlıq xarakteri daşıyır. Həm bu yarışda, həm də Olimpiadada Türkiyə və Azərbaycan idmançılarına uğurlar arzulayıram".
Bölmənin digər xəbərləri
