Zelenski: Ukraynada dronları ələ keçirən texnologiyaların istehsalı üzərində dörd şirkət çalışır
Kiyev, 21 iyun, AZƏRTAC
Ukrayna Prezidenti Volodimir Zelenski bildirib ki, iyunun 20-də Rusiyanın həyata keçirdiyi hava hücumu zamanı onlarla düşmən dronu xüsusi qurğularla vurulub.
AZƏRTAC “Ukrinform”a istinadla xəbər verir ki, bu barədə dövlət başçısı jurnalistlərlə söhbəti zamanı məlumat verib.
“İyunun 20-də həyata keçirilmiş hücum zamanı onlarla Rusiya dronu PUA əleyhinə qurğularla vurulub. Artıq söhbət bir neçə ədəddən getmir. Biz anlayırıq ki, bu, bizim alətimizdir və o, dəqiq işləyir”, – deyə Zelenski qeyd edib.
Prezident bildirib ki, Ukraynada bu tip qurğuların istehsalı ilə dörd şirkət məşğuldur.
“Ukraynada dörd şirkət bu məhsulları istehsal edir. Onlardan ikisi çox uğurludur”, – deyə Ukrayna Prezidenti əlavə edib.
Zelenski daha sonra qeyd edib ki, artıq xarici tərəfdaşlarla bu istehsalın maliyyələşdirilməsi ilə bağlı razılıq əldə olunub: “Biz Mertslə, Almaniya ilə razılaşmışıq. Onlar maliyyələşdirəcəklər. G7 sammitində Kanadanın Baş naziri Karniyə təşəkkürümü bildirdim”.
Ukrayna Prezidenti vurğulayıb ki, keçən illə müqayisədə bu il üçün daha çox artilleriya, uzaqmənzilli və yaxınmənzilli dronların alınmasını nəzərdə tutan müqavilələr bağlanıb.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
