Zelenski Ukraynaya gecə hücumuna adekvat cavab veriləcəyini bildirib
Kiyev, 12 may, AZƏRTAC
Rusiya bir neçə gün davam edən qismi atəşkəsi dayandırmağı seçdi və gecə Ukraynaya 200-dən çox hücum dronu göndərdi.
AZƏRTAC xəbər verir ki, bu sözləri Ukrayna Prezidenti Volodimir Zelenski “Telegram” hesabında yazıb.
O vurğulayıb: “Rusiya özü bir neçə gün davam edən qismi atəşkəsi dayandırmağı seçdi. Gecə ərzində Ukraynaya 200-dən çox hücum dronu buraxıldı. Cəbhə xəttinə yenidən 80-dən çox hava bombası atıldı, 30-dan çox hava hücumu qeydə alındı. Dnepr, Jitomir, Xarkov və Nikolayev vilayətlərində hücum dronları vuruldu”.
Ukrayna liderinin sözlərinə görə, enerji obyektlərinə, çoxmənzilli binalara və uşaq bağçasına ziyan dəyib, dəmir yolunda mülki lokomotivə də zərbə endirilib. “Bu zərbələr nəticəsində yaralananların olduğu məlumdur. Təəssüf ki, ölənlər də var. Onların ailələrinə və dostlarına başsağlığı verirəm”, - deyə Zelenski qeyd edib.
Prezident xatırladıb ki, Ukrayna tərəfi Rusiyanın bütün hərəkətlərinə adekvat qarşılıqlı tədbirlər barədə xəbərdarlıq edib.
Xarici işlər naziri Andrey Sibiqa “X” sosial media platformasında bildirdiyi kimi, Vladimir Putinin sülhə razılaşmaqdan təkrarən imtina etməsi Moskvaya təzyiqin artmasına və Kiyevin tərəfdaşlarının Ukrayna şəhərlərinə qarşı Rusiya terrorizminə son qoymaq üçün qətiyyətli hərəkətlərinə səbəb olmalıdır.
Ukrayna diplomatiyasının rəhbəri qeyd edib ki, Kiyev Moskvaya qismi atəşkəsin 11 maydan sonraya qədər uzadılmasını təklif edib. Həmin gecə Rusiya Ukraynaya qarşı mülki infrastrukturu hədəf alan 200-dən çox pilotsuz uçuş aparatı buraxıb. Bu, ən azı altı insanın yaralanmasına və bir nəfərin ölümünə səbəb olub.
Sibiqa bildirib: “Putinin sülh təklifini təkrarən rədd etməsi onun üçün müvafiq nəticələrə səbəb olmalıdır. Ukraynanın təsirli, uzunmüddətli sanksiyaları və tərəfdaşlarımızın qətiyyətli addımları ilə daha güclü təzyiqə ehtiyac var”.
Bölmənin digər xəbərləri
