Zəngəzur dəhlizi Türk dünyasının iqtisadi potensialının reallaşdırılması üçün geniş imkanlar açır - AÇIQLAMA
Bakı, 15 yanvar, AZƏRTAC
Ötən il beşinci ildönümünü qeyd etdiyimiz tarixi Zəfərimiz təkcə torpaqlarımızın işğaldan azad olunması ilə yekunlaşmadı, eyni zamanda, regionda və bütövlükdə Türk dünyasında uzunmüddətli strateji nəticələrə yol açan yeni reallıqlar yaratdı. Şübhəsiz ki, bu reallıqların ən mühüm və həlledici elementlərindən biri Zəngəzur dəhlizidir”.
Bu barədə AZƏRTAC-a açıqlamasında “Orta Asiya və Güney Qafqaz Söz Azadlığı Şəbəkəsi” İctimai Birliyinin (CASCFEN) sədri Nadir Azəri bildirib.
“Bu gün regionda təhlükəsizlik, iqtisadi səmərəlilik və qarşılıqlı fayda prinsipləri əsasında formalaşan böyükmiqyaslı layihələrdən danışırıqsa, həmin layihələrin mərkəzində məhz Zəngəzur dəhlizi dayanır. Bu dəhlizin qlobal ticarət və beynəlxalq nəqliyyat qovşaqları baxımından əhəmiyyəti ekspertlər tərəfindən dəfələrlə vurğulanıb. Mən isə məsələyə daha çox Türk dünyasının gələcəyi və strateji maraqları prizmasından yanaşmaq istərdim.
İlk növbədə qeyd etmək lazımdır ki, Zəngəzur dəhlizinin açılması Türk dünyası ölkələri arasında uzun illər sonra birbaşa quru əlaqənin bərpası deməkdir. Yəni, bu, təkcə Azərbaycanın ayrılmaz tərkib hissəsi olan Naxçıvanla quru əlaqənin təmin olunması anlamına gəlmir, eyni zamanda, Mərkəzi Asiya ilə Türkiyə arasında, dolayısı ilə bütün Türk dünyasının bir ucundan digər ucuna qədər uzanan vahid nəqliyyat və kommunikasiya xəttinin formalaşması deməkdir. Məhz bu baxımdan Zəngəzur dəhlizini Türk dünyasının “qızıl damarı” adlandırmaq olar”, - deyə Nadir Azəri vurğulayıb.
N.Azəri qeyd edib ki, Zəngəzur dəhlizi yalnız siyasi inteqrasiyanı gücləndirmir, eyni zamanda, Türk dünyasının iqtisadi potensialının reallaşdırılması üçün geniş imkanlar açır: “Bu dəhliz Türk Dövlətləri Təşkilatının (TDT) iqtisadi gücünü daha da artıracaq, mövcud marşrutlara alternativ, daha qısa və etibarlı logistika xətti formalaşdıracaq. Nəticədə Türk dövlətləri Avropa ilə Asiya arasında tranzit mərkəzinə çevrilərək qlobal ticarət zəncirlərində daha güclü mövqe qazanacaqlar. Eyni zamanda, enerji, yükdaşımalar və istehsal zəncirləri sahəsində yeni investisiya axınları üçün cəlbedici iqtisadi mühit yaranacaq. Bütün bunlar Türk Dövlətləri Təşkilatının regional və beynəlxalq iqtisadi çəkisini artırmaqla yanaşı, üzv ölkələrin uzunmüddətli dayanıqlı inkişafına da mühüm töhfə verəcək. Həmçinin Zəngəzur dəhlizinin açılması Türk Dövlətləri Təşkilatına üzv ölkələr arasında nəqliyyat xərclərini əhəmiyyətli dərəcədə azaldaraq ticarətin sürətini və həcmini artıracaq”.
CASCFEN sədrinin sözlərinə görə, Zəngəzur dəhlizinin Türk Dövlətləri Təşkilatı üçün başqa bir önəmi də var: “Bəlli olduğu kimi, Pakistan da TDT-yə maraq göstərir və TDT+ formatında təmsil olunacaq. Zəngəzur dəhlizi Çin-Pakistan İqtisadi Dəhlizi (CPEC) kimi layihələrlə inteqrasiya olunaraq Pakistan və Orta Asiya üçün daha geniş iqtisadi imkanlar açacaq. Deməli bu dəhliz həm də Pakistanı TDT-yə daha da yaxınlaşdıracaq”.
Bölmənin digər xəbərləri
