Zəngəzur istiqamətində kommunikasiyaların açılması bütövlükdə region üçün strateji əhəmiyyət kəsb edir - ŞƏRH
Bakı, 23 iyul, AZƏRTAC
Zəngəzur istiqamətində kommunikasiyaların açılması perspektivi təkcə Azərbaycan üçün deyil, bütövlükdə regionun iqtisadi inteqrasiyası və nəqliyyat əlaqələrinin genişlənməsi baxımından strateji əhəmiyyət kəsb edir.
Bu sözləri AZƏRTAC-a açıqlaması zamanı Naxçıvan Muxtar Respublikası Ali Məclisinin deputatı Canməmməd Canməmmədov deyib.
Onun sözlərinə görə, Prezident İlham Əliyevə olan yüksək ictimai etimadın əsas dayaqlarından biri də son illərdə həyata keçirilən ardıcıl iqtisadi islahatlar və dayanıqlı inkişaf strategiyasıdır.
“Müasir dünya iqtisadiyyatında müşahidə olunan geosiyasi gərginliklər, enerji bazarlarında qiymət dəyişkənliyi, qlobal inflyasiya və tədarük zəncirlərində yaranan problemlər fonunda Azərbaycanın makroiqtisadi sabitliyi qoruyub saxlaması həyata keçirilən iqtisadi siyasətin səmərəliliyini nümayiş etdirir. Son illər iqtisadi inkişaf modelinin əsas istiqamətlərindən biri neft gəlirlərinin uzunmüddətli strateji məqsədlərə yönəldilməsi olub. İnfrastrukturun yenilənməsi, müasir yol-nəqliyyat şəbəkəsinin qurulması, sənayeləşmənin sürətləndirilməsi, rəqəmsal iqtisadiyyatın inkişafı, sahibkarlığın dəstəklənməsi və insan kapitalına yatırımlar iqtisadi siyasətin əsas prioritetləri kimi müəyyənləşdirilib. Bu yanaşma Azərbaycanın iqtisadiyyatının xarici təsirlərə qarşı dayanıqlığını artırmaqla yanaşı, davamlı inkişafın institusional əsaslarını da möhkəmləndirir. Eyni zamanda, Orta Dəhlizin inkişafı və Zəngəzur istiqamətində kommunikasiya imkanlarının genişləndirilməsi perspektivləri Naxçıvanın geoiqtisadi əhəmiyyətini daha da artırır”, – deyə deputat əlavə edib.
Canməmməd Canməmmədov vurğulayıb ki, Prezident İlham Əliyevin fəaliyyətində diqqəti cəlb edən mühüm xüsusiyyətlərdən biri də regionlara müntəzəm səfərləri, həyata keçirilən layihələrə şəxsən nəzarət etməsi və vətəndaşlarla birbaşa ünsiyyətə üstünlük verməsidir: “Bu idarəetmə modeli qəbul olunan qərarların operativ icrasını təmin etməklə yanaşı, cəmiyyətlə dövlət arasında qarşılıqlı etimadın möhkəmlənməsinə də mühüm töhfə verir. Eyni zamanda, Prezident İlham Əliyevin Ümummilli Lider Heydər Əliyevin müəyyənləşdirdiyi dövlətçilik strategiyasını müasir dövrün çağırışlarına uyğun şəkildə davam etdirməsi Azərbaycanın inkişaf modelində siyasi varislik və institusional davamlılığın təmin olunmasının mühüm göstəricisidir. Müasir Azərbaycanın inkişaf dinamikası göstərir ki, siyasi sabitlik, milli həmrəylik, güclü dövlət idarəçiliyi və uzaqgörən strateji baxış qarşıdakı dövrdə də ölkənin tərəqqisinin əsas hərəkətverici qüvvələri olacaq. Qarabağın bərpası, Zəngəzur istiqamətində yeni iqtisadi imkanların formalaşması, yaşıl enerji strategiyasının genişləndirilməsi, beynəlxalq nəqliyyat dəhlizlərinin inkişafı və Azərbaycanın qlobal diplomatiyada artan rolu ölkənin yeni inkişaf mərhələsinin əsas prioritetlərini müəyyənləşdirir”.
Bölmənin digər xəbərləri
