REGİONLAR
Cəbhə bölgəsinin gənc müəllimi: Şagirdlərimin uğuru mənim uğurumdur VİDEO
Ağdam, 29 mart, Tahir Ağaməmmədov, AZƏRTAC
Ucqar kənddə müəllim işləmək nə qədər çətin olsa da, bir o qədər maraqlıdır. Çətindir ona görə ki, öyrəşdiyin şəhər mühitindən uzaqlaşırsan, illərdir tanıdığın dost-tanış yanında olmur... Müəllimlik etdiyim kənddə mənə olan münasibəti gördükdə bütün çətinliklərin arxada qalacağına əminlik yarandı, tərəddüdlər yox oldu. Sağ olsun dövlətimiz, mənim kimi gənc müəllimlərə yaratdığı imkanlardan istifadə edərək, qarşılaşdığım bir çox çətinlikləri arxada qoymuşam. Ümumiyyətlə, insan gərək çətinliyə öyrəşsin, ondan qorxmasın, ona qalib gəlsin...
AZƏRTAC-ın bölgə müxbiri xəbər verir ki, Sumqayıt şəhər sakini Sədaqət Musayevanın bu sözləri gənc müəllimin həyata olan baxışlarını əks etdirir. O, şagirdlərini də çətinlikdən qorxmamağa, ona qalib gəlməyə öyrədir.
Haşiyə: Respublikanın ümumtəhsil müəssisələrində vakant yerlərə müəllimlərin işə qəbulu mərkəzləşdirilmiş qaydada müsabiqə yolu ilə həyata keçirilir. Vakant yerlərdə işə başlamış müəllimlər üçün əlavə güzəşt və stimullaşdırıcı tədbirlərin müəyyənləşdirilməsi gənc mütəxəssisləri ucqar kəndlərdə pedaqoji fəaliyyətə başlamağa həvəsləndirib. Sədaqət Musayeva da belə müəllimlərdən biridir. Həyat yoldaşı hərbçi olan S.Musayevanın iki azyaşlı övladı var.
Sədaqət Musayeva Sumqayıt şəhər 10 nömrəli tam orta məktəbi bitirdikdən sonra keçmiş Azərbaycan Müəllimlər İnstitutunun (AMİ), daha sonra isə Dillər Universitetinin filologiya fakültəsində təhsil alıb. Hər iki ali məktəbi fərqlənmə diplomu ilə bitirib. AMİ-nin Sumqayıt filialında üç il müəllim işləyən S.Musayeva 2017-ci ildə Təhsil Nazirliyinin təşkil etdiyi müsabiqədən uğurla keçib və Ağdam rayonunun cəbhə xətində yerləşən Hacıməmmədli kənd tam orta məktəbində pedaqoji fəaliyyətə başlayıb. Hazırda o, Hacıməmmədli kəndində sevdiyi peşə üzrə çalışır, Azərbaycan dili və ədəbiyyatı fənnini tədris edir, gənc nəslin təlim-tərbiyəsinə töhfəsini verir.
Məktəbə ilk gəlişini xatırlayan gənc müəllimə deyir: “Kəndi, kənd məktəbini başqa cür təsəvvür edirdim. Buraya gələndə düşündüklərimin əksini gördüm. Məktəbin binası yeni inşa olunub. Şagirdlərin təlim-tərbiyəsi üçün hər cür şərait var. Təhsilin səviyyəsi, şagirdlərin nizam-intizamı, dərsə davamiyyəti yüksəkdir. Müəllim kollektivi səmimi və mehribandır. İlk gündən çox gözəl münasibətlə qarşılaşdım. Şagirdlərimdən də çox razıyam. Onlarla işləməkdən zövq alıram. Şagirdlərdə dərsə, təhsilə olan həvəs məni daha da ruhlandırır. Bir müəllim kimi ən böyük istəyim onların uğurunu görməkdir. Şagirdlərimin uğuru mənim uğurumdur”.
Sumqayıtlı gənc xanım ilk gündən şagirdlərin sevgisini və hörmətini qazanıb. Biz məktəbdə olarkən gənc müəllim 6-cı sinifdə Azərbaycan dili fənnini tədris edirdi. Şagirdlər müasir təlim metodlarından istifadə olunmaqla keçilən dərsdə fəal idilər. Onlarla söhbət zamanı müəllimlərini çox sevdiklərini və böyüyəndə onun kimi müəllim olacaqlarını bildirdilər.
Ümumi təhsil müəssisələrində vakant yerlərə müəllimlərin işə qəbulunun mərkəzləşdirilmiş qaydada müsabiqə yolu ilə həyata keçirilməsini yüksək qiymətləndirən S.Musayeva ucqar kənd məktəblərində işləmək istəməyənlərə də tövsiyələrini bildirib: “Gənc mütəxəssislərin kənd rayonlarındakı məktəblərdə əmək fəaliyyətinə başlaması üçün dövlətimiz tərəfindən bir sıra həvəsləndirici tədbirlər həyata keçirilir. Həmin müəllimlərə kommunal xidmətləri ödəmək, kirayə haqqı, yol xərci və s. üçün kompensasiya verilir. Ucqar kənd məktəblərində işləmək müəllimləri qorxutmasın. İstəyirəm ki, pedaqoji ixtisasa yiyələnən gənclər heç nədən çəkinmədən gəlib kənd məktəblərində işləsinlər. Ucqar kənddə işləmək bir qədər çətin olsa da, daha maraqlıdır, zövqvericidir. Əsas odur ki, işimizi sevək, şərəfli müəllimlik peşəsini layiqincə davam etdirək. Mən burada heç bir çətinlik hiss etmirəm. Məktəb ucqar kənddə, cəbhə bölgəsində olsa da, heç nədən qorxmur, hər gün məktəbə gedərək, sevimli peşəmlə məşğul oluram”.
Sədaqət Musayevanın məişət qayğıları ilə tanış olmaq üçün yaşadığı evə də yollandıq. Ev sahibəsinə kömək edən gənc müəllim boş vaxtında kitab oxuyur, növbəti gün keçəcəyi dərslərə hazırlaşır.
Qeyd edək ki, Ağdam rayonunun ümumtəhsil müəssisələrindəki vakant yerlərə ötən il Təhsil Nazirliyinin mərkəzləşdirilmiş qaydada təşkil etdiyi müsabiqədən keçən 139 müəllim gəlib. Görülən tədbirlər sayəsində rayonda müəllim çatışmazlığı problemi getdikcə həllini tapmaqdadır. Lakin hələ də bəzi məktəblərdə kimya, biologiya, fizika və riyaziyyat fənləri üzrə ixtisaslı müəllimlərə ehtiyac var.